Жедел жәрдем көмектеспей қойған: Ақтауда бала көшенің қақ ортасында көз жұмды
Әлеуметтік желіде жедел жәрдем бригадасы көшенің ортасында есінен танып қалған 12 жасар балаға көмек беруден бас тартқаны туралы видео пайда болды, деп хабарлайды Stan.kz ақпарат агенттігі Lada.kz басылымына сілтеме жасап.
Маңғыстау облысы жедел жәрдем станциясының директоры Айралбек Ширшикбаев бұл сөздерді жоққа шығарып, дәрігерлер келген кезде баланың көз жұмғанын мәлімдеді.
Ақтау тұрғыны әлеуметтік желілерде куәгерлер 3-ықшамауданнан ес-түссіз жатқан баланы көргендері туралы жазады.
“Үшінші ықшамауданда бала көшеде қайтыс болды. Біз жедел жәрдем көлігін қырық минут күттік. Содан кейін олар баланың ата-анасы келмейінше, біз ештеңе істемейміз деді. Ата-ананы қайдан іздейміз. Жедел жәрдем шақырғанымен, ол көмектескен жоқ”, – делінген жазбада.
Маңғыстау облысындағы жедел жәрдем станциясының директоры Айралбек Ширшикбаев дәрігерлер келген кезде баланың жүрегі тоқтап қалғанын, бірақ соған қарамастан фельдшер балаға көмек беруге тырысқанын мәлімдеді.
“Команда шақырту келген сәттен бастап тоғыз минут ішінде қажетті жерге жетті. Бала тексерілді. Бірақ жедел жәрдем барған сәтте баланың жүрегі тоқтап қалған еді. Осыған қарамастан, фельдшерлер 30 минуттық жүрек-өкпе реанимациясын жасады. Біз үшін бұл әдетке айналған әрекет. Фельдшер мәйіт көрсе, бірден оны тірілтуге тырысады. Бірақ, өкінішке қарай, бұл әрекеттер нәтиже бермеді. Баланы көшеде өтіп бара жатқан адамдар тауып алған”, – дейді Айралбек Ширшикбаев.
Алдын ала мәліметтер бойынша баланың жүрегі тоқтап қалған. Lada.kz облыстық полиция департаментінен баланың өліміне қатысты түсініктеме күтеді.