Әуежайда ұстап алған: Мысырда қазақстандық азамат балаларымен бірге елге жіберілмей жатқанын айтып, шағымданды

Қазақстандық азаматты балаларымен бірге Мысыр әуежайында ұстап, елге жібермей қойған. Бұл туралы Stan.kz ақпарат агенттігі хабарлайды. 

Ренат Шанғараев әлеуметтік желілерде Мысырда ұсталғанын мәлімдеді.

Ол Мысырға төрт және сегіз жасар қыздарымен демалу мақсатында келген. Сапарды "Компас" туристік компаниясы ұйымдастырыпты.

“Мені әуежайдан алып кетіп, төлқұжатымызды алып, 27 сағат ұстап отыр. Не деген сұмдық. Сондай-ақ не үшін ұстап отырғандарын айтпайды. Консулмен хабарласа алмадық. Мен интернеттен тапқан нөмірлері жауап бермейді. Мысырдан кетуге де рұқсат бермеді. Бізді екі полиция күзетуде”,  – деді ер адам.

Ер адамға бұрын Мысырда болдыңыз деп айтқан.

“Егер қылмысқа қатысым болса немесе күдіктенсе, онда неге олар айыптап, істі сотқа бермейді? Ал ешқандай себеп болмаса, онда еркін адамды айыптаусыз неге ұстап отыр?  Мен тіпті қайтадан жаңа билет алуға дайынмын", – деді қазақстандық.

Шанғараев қазақстандық құзыретті органдардан көмек сұрайды.

Stan.kz тілшісі сыртқы істер министрлігіне хабарласып, оқиғаға қатысты түсініктеме сұрады. СІМ өкілі жағдайды анықтайтынын мәлімдеді.