Тізімге 110 адам кіріп, оның ішінде 42 қатысушы іріктелді. Тізімді сарапшылар бағалады. Олардың бағалауы бойынша елдегі ең ықпалды 25 әйелдің тізімі жасалды.

"Рейтингті Halyk банкінің басшысы Үміт Шаяхметова бастады", – деп жазды Forbes Woman Kazakhstan журналының бас директоры Зульфия Хайбуллина.

Шаяхметовадан басқа, қаржы секторы бойынша рейтингте Қазақстан Қаржы нарығын реттеу және дамыту агенттігінің төрайымы Мәдина Әбілқасымова (2-орын), "Отбасы банкінің" басшысы Ләззат Ибрагимова (5-орын) және KASE Басқарма төрағасы және директорлар кеңесінің мүшесі Алина Алдамберген (11-орын) бар.

Тізімде Қазақстан президенті Қасым-Жомарт Тоқаевтың әпкесі Қарлыға Ізбастина да бар. Ол 17-орынға жайғасты. Қарлыға Ізбастина – әкесі Кемел Тоқаев атындағы қайырымдылық қорының тең құрылтайшысы және бұрын Meerbusch және Kazakhstan Tungsten & Molybdenum Company арқылы бизнес жасаған.

Рейтингте іскер әйелдер көрсетілген. Мәселен, 18-орынды Lancaster Holding-тің тең құрылтайшысы, еліміздегі ең ірі қала – Алматы қаласының әкімі Ерболат Досаевтың жұбайы Гүлнәр Досаева иеленді.

Үздік 25-ке үкіметтегі әйелдер кірді. 4-орынға Мәдениет және ақпарат министрі Аида Балаева жайғасты.

Дариға Назарбаева мен Динара Құлыбаева ықпалды әйелдер рейтингінде жоқ. Екеуі де – еліміздің тұңғыш президенті Нұрсұлтан Назарбаевтың қызы. Екеуі де Қазақстанның ең ауқатты адамдарының рейтингіне енген.

Дариға Назарбаева ең бай 75 бизнесменнің ішінде 15-орында. Оның байлығы 590 миллион долларға бағаланады. Ал Динара Құлыбаева күйеуі Тимур Құлыбаевпен бірге ең бай адамдар рейтингінде екінші орынды алады. Олардың әрқайсының табысы 5 миллиард доллар.

Айта кетейік, бұған дейін Желіде Дариға Назарбаеваның Монако ханшайымы Грейс Келлидің құрметіне арналған қайырымдылық аукционына қатысқаны түсірілген видео тараған еді. Қайырымдылық кешіне 2 адамға билет құны 33 мың еуро, яғни 17 миллион теңге. Назарбаевтар әулетінен 6 адам қатысқан. Осылайша, қайырымдылық кешіне кіру сомасы – шамамен 51 миллион теңге болған.

Талқылау