Мьянмадағы жер сілкінісі: Үйінді астында төрт күн жатқан қарт әйел құтқарылды
Мьянмада үйінділерінің астында төрт күнге жуық жатқан қарт әйел құтқарылды. Бұл туралы Stan.kz ақпарат агенттігі Associated Press басылымына сілтеме жасап хабарлайды.
Фото: TASS
63 жастағы әйел қуатты жер сілкінісінің салдарынан қонақүйдің үйінділері астында қалған. Ол үйінді астында 91 сағат жатып, аман қалды. Құтқарушылар мен еріктілер бірнеше күн бойы үйінділерді ақтарып, әйелді аман алып қалды.
Құтқару жұмыстарын елде бірнеше жылдан бері жалғасып жатқан азаматтық соғыс қиындатып отыр. Мемлекетте зардап шеккендердің бәріне көмек көрсетуге қажетті ресурстар жетіспейді. Көптеген адам ашық аспан астында, электр жарығы мен ауызсуға қолжетімсіз жағдайда түнеуге мәжбүр.
Соған қарамастан, Мьянма әскери хунтасы гуманитарлық көмек көрсету үшін атысты тоқтату туралы ұсынысты қабылдамады. Елде ұрыс қимылдары әлі де жалғасып жатыр. Құтқару жұмыстарына Ресей, Қытай, Үндістан, Біріккен Араб Әмірліктері және Оңтүстік-Шығыс Азиядағы бірнеше елден келген құтқарушылар жұмылдырылған.
Еске салайық, Оңтүстік-Шығыс Азияда екі күшті жер сілкінісі болды. Соның салдарынан Бангкокта салынып жатқан көпқабатты ғимарат құлады. Жерасты дүмпулерінің эпицентрі Мьянмада тіркелді. Әлеуметтік желіде кран орнатылған биік ғимараттың құлап, үлкен шаң бұлты көтерілгені, ал адамдардың айқайлап, жан-жаққа қаша бастағаны көрсетілген видеолар тарады. 29 наурыз күні елде магнитудасы 5,1 балдық тағы бір жер сілкінісі болды.
Жер сілкіністері кезіндегі адам шығынына байланысты жеті күндік ұлттық аза тұту жарияланды.