Музыкалық білімі жоқ өнер иелері кімдер? (фото)

Отандық эстрадада музыкалық білімі болмаса да, елдің сүйіспеншілігіне бөленіп жүрген әншілер жетерлік. Олардың көпшілігі негізгі мамандықтарын ата-ананың қалауымен немесе мәжбүрліктен таңдаған. Бірақ іштегі талант сыртқа шықпай қойсын ба? “Бұйырған кетпейді” демекші, музыкалық білімі болмаса да, бұл әншілер көптің қошеметіне ие болып жүр.

Stan.kz назарларыңызға музыкалық білімі жоқ әншілер тізімін ұсынады.

Көпшіліктің сүйікті әншісіне айналған Ернар Айдардың негізгі мамандығы – заңгер. Ол қазақ ұлттық аграрлық университетінің «Экономика және бизнес» факультетін бітірген. Ернар әншілікті мамандық деп санамайды. Оның айтуынша, әншілік – ол Құдайдан берілетін сый.

Бүгінде отандық кинофильмдер мен телехикаялардан түспейтін актер Тәуекел Мүсілімнің негізгі мамандығының өнерге еш қатысы жоқ. Ол Қаныш Сатпаев атындағы Қазақ ұлттық техникалық университетін «машина жасау» мамандығы бойынша бітірген. Өнер әлеміне кездейсоқ келген. Отандық режиссерлердің бірі сымбатты жігітті жаттығу залынан байқап, оны кастингке шақырған.

«Жігіттер» квартетінің қос әншісі Ердос Қанаев пен Айдар Байжановтың да музыкалық білімі жоқ. Ердос университетті «қазақ тілі мен әдебиеті» пәнінің мұғалімі мамандығы бойынша бітірсе, Айдар Байжанов мұнайшының оқуын оқыған.

Сол сияқты мыңдаған тыңдарманы бар Айқынның мамандығы өнерге үш қайнаса сорпасы қосылмайды. Ол Қаныш Сәтпаев атындағы қазақ ұлттық техникалық университетінде инженерлік білім алған. Ал өнерге SuperStar жобасы арқылы келген.

Халықтың қошеметіне бөленіп жүрген жұлдызды жұп Бүркіт пен Аишаның да музыкалық білімі жоқ екен. Бүркіт заңгер, кейіннен құрылыс инженері мамандығы бойынша білім алған. Соған қарамастан, ол домбыраның құлағында ойнайды, халық әндерін нақышына келтіре орындайды. Ал Айшаның мамандығы – дизайнер.

Қайрат Нұртас сынды мегажұлдызға ән жазып беріп жүрген композитор әрі әнші Ғазизхан Шекербековтің де музыкалық білімі жоқ екен. Әйткенмен, бұл жайт Ғазизханның хит әндер жазуына кедергі келтірген емес.

Өзіндік стилімен ерекшеленетін әнші Лидоның да негізгі мамандығы әнші емес. Бұл туралы Лидоның немере інісі Дидар Кәден жұлдызды жиындардың бірінде айтып қойған болатын.

Өз әндерін өзі жазатын әнші Кенталдың да негізгі мамандығы эколог болып шықты. Әнші бұл мамандықты «дипломы бар» деген атқа жету үшін ғана меңгерген. Ал ата-анасының қалауын орындап болған соң, жаны қалайтын мамандыққа бет бұрған.

Танымал әнші Айдана Меденова кішкентайынан ән салғанымен, жоғары оқу орнында дизайнер-интерьер мамандығы бойынша білім алған.

Жіберіп алмаңыз:

Соңғы бір жылда сәбилі болған жұлдыздар (фото)

Ең танымал ағайынды жұлдыздар (фото)

Қазақстан жұлдыздары Джеки Чанмен түскен суреттерін көрсетіп мақтанды (фото)

Динара Сәтжан «Қазақстан» арнасына басшылық қызметке келді