Микрофоны қосулы қалған Кэмерон «жемқорлық ең көп жайлаған елдерді» атап қалды (видео)
Британия премьер-министрі Дэвид Кэмерон патшайым Елизавета II ғана естіп, білуі тиіс болған әңгімені байқаусызда бүкіл әлемге жайды.
Сурет: 24smi.org
Ертең Кэмеронның бастамасымен Лондонда өтетін антикоррупциялық саммитке қай елдің басшылары келетінін патшайымға баяндаймын деп тұрып, премьер соған дейін болған шара кезінде қолданылған микрофонның әлі қосылып тұрғанын байқамай қалды.
«Әңгіменің ашығын айтсақ, Британияға әлемдегі жемқорлыққа белшесінен батқан екі елдің басшысы келе жатыр. Нигерия мен Ауғанстан дүние жүзіндегі сыбайлас жемқорлыққа белшесінен батқан елдер деуге болады»- деді Кэмерон.
Монархтардың абыройы болғанда, бұған патшайым Елизавета ІІ ешнәрсе деп үн қатпады. Тек сол жерде премьер жанында тұрған Кантербёри Архиепископ Джастин Уелби ғана «бірақ президент жемқор емес қой» деп айтып қалды. Бірақ, британдық дінбасының нақты қай президент туралы айтқанын жұрт біле алмай, күпті көңілде қалды.
Жіберіп алмаңыз:
Дэвид Кэмерон мұсылман қыздарды өзгелермен тең көруді талап етті