Mango сән брендінің негізін қалаушы, миллиардер Андичті өлтірді деген күдікке өз ұлы ілінді

Фото: Getty images

Mango сән брендінің негізін қалаушы, миллиардер Исак Андичтің ұлы Джонатан Андич ресми түрде кісі өлтіру ісі бойынша тергеуге алынды. Оның әкесі былтыр желтоқсан айында Барселона маңындағы тауда серуендеу кезінде биіктіктен құлап, қаза тапқан еді. Бұл туралы Stan.kz ақпарат агенттігі хабарлайды.

71 жастағы кәсіпкермен сол күні бірге болған жалғыз адам оның ұлы Джонатан болған. Бастапқыда істі қараған судья өлімге қатысты қылмыс белгілері табылмады деп тергеуді тоқтатқан. Алайда биыл наурыз айында Барселона маңындағы Марторель қаласының соты істі қайта қарап, оны қайтадан тергеуге алды.

Полиция ол кезде оқиғаны кездейсоқ қайғылы жағдай ретінде қарастырып келген. Алайда, испандық БАҚ-тың хабарлауынша, 44 жастағы Джонатан Андич енді кісі өлтіруге күдікті ретінде тергеліп жатыр. Әзірге оған ресми айып тағылған жоқ.

"Андич отбасы Исак Андичтің өліміне қатысты соңғы айларда ешқандай пікір білдірмеді және болашақта да түсініктеме бермейді. Сонымен қатар, отбасы жүргізіліп жатқан заңды процестерге құрметпен қарайды және құзырлы органдармен толық ынтымақтастықта болады. Біз бұл істің жақын арада аяқталып, Джонатан Андичтің кінәсіздігі дәлелденетініне сенімдіміз", — делінген отбасы таратқан мәлімдемеде.

Джонатан Андич әкесінің өлімі бойынша жалғыз куәгер болған. 2024 жылдың 14 желтоқсанында олар Барселона маңындағы Монсеррат тауы аумағында серуендеп жүрген. Сол кезде Исак Андич жартастан құлап кеткен.

Оқиға кезінде ұлы әкесінің алдында жүргенін, арт жақтан тастардың домалаған дауысын естіген соң бұрылып қарағанда әкесінің жардан құлағанын көргенін айтқан.

31 қаңтарда ол полиция бөлімінде үш сағаттан астам уақыт жауап берген. Сондай-ақ, тергеушілер Mango компаниясының негізін қалаушының өмірлік серіктесі, кәсіби гольфші Эстефания Кнуттан да жауап алған. Ол кәсіпкерді соңғы рет тірі көргендердің бірі болған.

Сондай-ақ полиция жүргізушіден және оқиға орнына барған жергілікті офицерден де түсініктеме алған.

Судья Джонатан Андичтің куә ретіндегі екі түрлі жауабында қайшылықтар бар екенін және әкесімен "қарым-қатынасы нашар" болғанын атап өткен. Сол себепті ол енді ресми түрде тергеуге алынып отыр.

Испан басылымдары, соның ішінде El País, Андичтің өлімі "кісі өлтіру" ретінде қарастырылып жатқанын жазды.

Газет деректері бойынша, тергеушілер әзірге тікелей дәлел таппаған, бірақ бірнеше ай бойы жиналған жанама айғақтар істің кездейсоқ болмағанын көрсеткен.

"Ең бастысы — екі адамның куәлігі тергеу бағытын өзгертті. Оның бірі — оқиға кезінде жанында болған жалғыз адам, кәсіпкердің үш баласының бірі Джонатан Андич. Оның түсініктемелері бір-біріне қайшы келіп, полиция жүргізген тексеру нәтижелеріне сәйкес келмеген.

Екінші маңызды куәлік — Эстефания Кнуттан алынған түсініктеме. Ол әке мен баланың арақатынасы нашар болғанын айтқан", — деп жазады El País.

Сот тергеу материалдарының құпиясын жарияламау туралы үкім шығарды, сондықтан ресми органдар істің егжей-тегжейін жария ете алмайды.

Түркиядан қоныс аударған Исак Андич 1984 жылы ағасы Нахманмен бірге Mango компаниясын құрған. 2024 жылға қарай компанияда 14 мыңнан астам қызметкер, 110 елде 2 700-ден астам дүкен жұмыс істеген, оның 45-і — Ұлыбританияда орналасқан.

2024 жылы Mango өзінің 40 жылдығына орай Виктория Бекхэммен бірлескен капсулалық топтаманы таныстырған.

Forbes журналы Исак Андичтің байлығын өлер алдында 4,5 миллиард доллар деп бағалаған. Бұл оны Каталониядағы ең бай адам, әрі Испаниядағы ең бай кәсіпкерлердің бірі еткен.

Оның құны 25 миллион фунт стерлинг болатын жеке ұшағы мен шамамен құны сондай 175 футтық яхтасы болған. Сондай-ақ ол 330 футтық "Nirvana II" атты әлемдегі ең ірі яхтаны салуды жоспарлаған, бірақ кейін жобадан бас тартқан.

Андич көпшілік алдында сирек шыққан. 2007 жылға дейін оның суреттері БАҚ-та өте аз жарияланған. 2010 жылы ол Испаниядағы ең бай адамдардың екінші сатысына көтерілген. Оның үш ересек баласы бар: ұлы Джонатан және қыздары Джудит пен Сара.

Каталония президенті Сальвадор Илья әлеуметтік желідегі жазбасында "Исак Андичтің қазасына қатты қайғырдым. Ол Каталонияны әлемге танытқан көреген кәсіпкер болды. Оның еңбегі каталондық және жаһандық сән индустриясында өшпес із қалдырды. Отбасына, достарына және Mango ұжымына көңіл айтамын" деді.

Mango бас директоры Тони Руис ресми мәлімдемесінде "Біз Mango компаниясының негізін қалаушы және директорлар кеңесінің төрағасы Исак Андичтің кенеттен қаза болғанын терең өкінішпен хабарлаймыз. Ол өзінің өмірін Mango-ға арнады және компанияның жетістіктеріне үлкен үлес қосты. Исактың стратегиялық көзқарасы мен адамгершілік қасиеттері әріптестері үшін әрдайым үлгі болды. Оның мұрасы біздің ортақ еңбегіміз болып қала береді. Бұл ауыр сәтте біз отбасының қайғысын бірге бөлісеміз", — деді.