Ауыл айналасында ұлтарақтай жер қалмады, мал бақсаң иесі қуып шығады дейді тұрғындар. Күнкөрісі төрт түлікке қараған ауылдағы ағайын енді қалай жан бағамыз деп шарасыз күйде отыр.

Ауылда мал бағатын жер жоқ деген Жамбыл ауылының халқы міне көрші ауылға мал жаю үшін осылайша көлікке тиеп, жіберіп жатыр. Көлік иесі әрбір малдың басына 2 мың теңгеден алады. Ауыл халқы үшін бұл қып-қызыл шығын. Көксу ауданына қарасты Жамбыл ауылының халқы осылайша малды әупірімдеп көлікке тиеп алып, жағалай жайылым іздейміз деп отыр. Тіпті мал алысқа барып жайылса, оған төленетін төлем де көбейеді дейді.

"Елдердің малдарын тиеймін, рейсіне 20-25 мыңнан аламын. Өзім деген соң ауылдың кісілеріне, Әйтпесе 60-70 шақырым жер, жел де қатты соғады", - дейді Көксу ауданына қарасты Жамбыл ауылының тұрғыны Мәжен Ахунжан.

"Енді мына әкім бізге бірдеңе жасасын, барады да ауылдағы жерді әкім кім барады, соған бере салады. Ақшасы көп, қалтасы көпке", - дейді тағы бір тұрғын Мәмиля Биназарова.

"Биыл малды жолатпайды, бидай салған, неше түрлі егін еккен", - дейді Биназар Шоқпаров.

"Жайылым жоқ болғаннан кейін Талаптыға барып жалынып, әкем-көкем деп сиырымызды камазға тиеп, апарып жатырмыз. Міне менің айтарым, осы мәселеміз шешілмей тұр", - дейді аул тұрғыны Әуесхан Омарбеков.

Ауыл халқы жер ауылдың халқына емес, басқа өңірдің адамдарына беріліп жатыр деп наразы. Ал әкімдіктегілер біз ешкімді бөлмейміз деп отыр. Жамбыл ауылы бойынша 850 бас ірі қара, 2,5 мың қой, 200 ден аса жылқы бар деген ауыл әкімдігі мың жарым гектарға жуық жайылым бар деп отыр. Бірақ мал басының өсуіне байланысты жер жетпей жатыр дейді. Мәселені шешу жолдарын қарастырып жатырмыз деп қысқа қайырды.

Талқылау