Конференцияға Қазақстанның бірнеше жоғары оқу орындарының оқытушылары (Орал, Семей, Қарағанды, Атырау, Ақтөбе қалаларынан), қоғам қайраткерлері, жас ғалымдар, магистранттар мен студенттер қатысты.

Алдымен ҚР Тәуелсіздігі мерекесіне орай Қазақстан Республикасының мемлекеттік әнұраны орындалып, М.Өтемісов атындағы БҚУ ғылыми жұмыс және халықаралық байланыстар жөніндегі проректоры Ахмеденов Қажымұрат Мақсотұлы құттықтау сөз сөйледі.

Конференция модераторы, тарих ғылымдарының кандидаты, доцент Боранбаева Бақтылы Сансызбайқызы Кеңестер Одағының ыдырауынан кейін өзінің Тәуелсіздігін жариялаған Қазақстан Республикасындағы ұлттық тарихты зерделеу, мемлекеттік идеялогияға, еліміздің жаһандық өркениеттегі қарышты қадамдарына тоқталып баяндамашыларға сөз берді.

Жұмыс барысында бүгінгі күнге дейін Тәуелсіз 22 жылдың ішінде алғашқы кезеңдегі дағдарыстардан кейінгі еліміз жеткен жетістіктер, ХҮІІІ-ХІХ ғасырлардағы жер үшін күрестер, 1941-1945 жылдардағы тарих сахнасындағы ақтаңдақтар, 1986 жылғы желтоқсан азаттық қозғалысы және 1991 жылғы қыркүйек оқиғалары, қазіргі мемлекеттік жастар саясаты және тағы басқа да Тәуелсіздік жолындағы тарихи белестің маңызды мәселелері талқыланды. Конференцияда онлайн және офлайн форматта баяндамашылар М.Өтемісов атындағы БҚУ аға оқытушысы, PhD философия докторы - Сабыргалиева Назгүл Бақтығалиқызы, Х.Досмұхамедов атындағы Атырау мемлекеттік университетінің профессоры, тарих ғылымдарының докторы - Бердіғожин Лесқали Базарғалиұлы, Шәкәрім университетінің профессоры, тарих ғылымдарының кандидаты - Кәрімов Мұқтарбек Қарпықұлы, БҚО тарихи-өлкетану музейінің бөлімі М.Мәметова мемориалдық музейінің меңгерушісі, ҚР Журналистер одағының мүшесі - Батырханов Ахмедияр Қуанұлы, Е.А.Бөкетов атындағы Қарағанды университетінің аға оқытушысы - Уалиева Гүлмира Қуанышқызы, Ақтөбе облысы, Мәртөк ауданы, №2 Мәртөк мектеп-гимназиясының тарих пәні мұғалімі - Дузбасова Айдана Жеңісқызы, Орал қалалық №41 мектеп-лицейінің тарих пәні мұғалімі - Жұмағалиева Орынгүл Аманжолқызы, М.Өтемісов атындағы БҚУ Тарих білім бағдарламасының 2-курс магистранты - Жолахова Гүлшат Таубайқызы қатысып баяндама жасады.

Пікір алмасу барысында конференция қонақтары ардагер, қоғам қайраткерлері Тихон Әліпқалиұлы, "Нарын қасіреті" қорының төрағасы Сабиров Хайролла Сабырұлы, облыстық ардагерлер Кеңесі төрағасының орынбасары Ғаббас Әділгерей Уәлиұлы, БҚУ ардагерлер кеңесінің төрағасы Құсаинов Мерғали Серғазыұлы, филология ғылымдарының докторы Хасанов Ғабит Қайыржанұлы сөз сөйлеп, еліміздің тәуелсіздік жолындағы қилы тағдыры туралы ой бөлісті. Батыс Желтоқсан қоғамының мүшесі, қоғам қайраткері Нұрланбаев Мұқтар Есмағұлұлы қазақ жастарының азаттық күресі және тәуелсіздіктің ащы шындығын өзінің басынан өткерген тарихи оқиғалар мен оның куәгерлері арқылы өте әсерлі баяндап берді. Ол 1986 жылғы желтоқсан қозғалысы және 1991 жылғы қыркүйек оқиғаларын мектеп және оқу орындарының оқулықтарына енгізу керек деген пікір білдірді.

Талқылау