Леон Маршан 14 жылдан кейін әлемдік рекордты жаңартты

Фото: Reuters

Сингапурда өтіп жатқан әлем чемпионатында француз жүзгіші Леон Маршан 200 метрге кешенді жүзуден әлем рекордын жаңартты. Бұл туралы Stan.kz ақпарат агенттігі хабарлайды.

Олимпиаданың төрт дүркін чемпионы бұл қашықтықты 1 минут 52.69 секундта жүзіп өтті. Осылайша ол 2011 жылы америкалық Райан Лохте орнатқан 1:54.00 уақыт көрсеткішін жаңартып, рекордты 1.31 секундқа жақсартты.

Спортшы бұл жетістігіне таңданып қалғанын жасырмады:
"Мен өз рекордымды жақсарта аламын деп ойладым, бірақ бірден бір секундтан артық нәтижеге қол жеткіземін деп күтпедім. Бұл — ақылға қонымсыз нәтиже", — деді Маршан жарыстан кейінгі сұхбатында.

Осы әлем чемпионатында Маршан тек екі қашықтыққа – 200 және 400 метрге кешенді жүзуге қатысуды жөн көрді. Ол 200 метрге баттерфляй және 200 метрге брасс жарыстарына қатысудан бас тартты, себебі өзінің басты мақсаттарына шоғырлануды таңдаған.

Айта кетейік, 22 жастағы Леон Маршан – қазіргі жүзу спортындағы ең жарқын есімдердің бірі. Париж-2024 Олимпиадасында ол төрт алтын медаль жеңіп, жүзу тарихына есімін алтын әріппен жазды. Сонымен қатар, ол 400 метрге кешенді жүзуден де әлем рекордының иесі болып табылады.