"Құдай оларды онсыз да жазалады": Шенеунік ерекше қажеттілігі бар адамдарға қатысты айтқан сөзі үшін сынға ұшырады

Фото: esbolatovkanat Instagram парақшасынан алынды

Алматы облысы әкімінің бірінші орынбасары Қанат Есболатовтың ерекше қажеттілігі бар адамдарға қатысты айтқан сөзі әлеуметтік желіде сынға ұшырады. Көпшілік оның сөзін кемсітушілік әрі қорлау деп бағалады. Бұл туралы Stan.kz ақпарат агенттігі хабарлайды.

Денсаулық сақтау министрі Ақмарал Әлназарованың Талғар ауданында халықпен кездесуінде Алматы облысы әкімінің бірінші орынбасары Қанат Есболатов күтпеген жерден былай деген:

“Мүгедектерді сыйлайық, оларды онсыз да Құдай жазалады”.

Бұл сөзден кейін қазақстандықтар әлеуметтік желілерде шенеунікті қатты сынға алды. Олар: "Мұны қалай түсінуге болады? Сіз не айтқыңыз келді? Алла оны жазалады, дегіңіз келді ме? Ол мұндай мәлімдеме үшін жауап беруі керек пе!", "Құрметті әкім орынбасары, сіздің сөзіңіз реніш тудырды. Сізге этика мен субординацияны үйретпеген бе?", "Бұл қорлау" деп жазды. 

Көпшілік сынынан кейін Қанат Есболатов Instagram желісінде түсініктеме берді. Оның айтуынша, залда адам көп болып, жиын 4 сағатқа созылған. Ол сөзінің қате айтылғанын меңзеді.

“Денсаулық сақтау министрімен Талғарда өткен кездесуге қалың жұрт жиналды. Әрқайсы өзекті мәселе көтеріп, сұрақ қоюға асықты. Сондықтан кезек те үлкен болды. Регламент бойынша кездесуге екі сағат бөлінген еді. Бірақ, сұрақтың көп болуына байланысты жиын шамамен 4 сағатқа созылды. Келген азаматтардың арасында бірқатар мүмкіндігі шектеулі жан болды. Кейбірі тік тұрып, өз кезегін күтті. Кезегі жеткенде залдағы бірнеше адам сөзін бөліп, оған кедергі жасай бастады. Регламентті сақтауға шақырдым. Алайда орыс тілінде айтқан сөзімде қателік бар. Ойымды дұрыс жеткізбеппін. “Құдай үлкен сынақ берген” деп айтпақ болғанмын”, – деп жазды ол. 

Сондай-ақ ол айтқан сөзі үшін көпшіліктен кешірім сұрады.

“Айтқан сөзім көпшіліктің көңіліне, тіпті намысына тигенін түсіндім. Осы үшін шын ниетіммен кешірім сұраймын. Ауқымды іс-шараларда алдымен егде жастағы тұрғындарға және мүмкіндігі шектеулі азаматтарға жол беру маңызды. Қай жиын болмасын, оларды көп күттірмей, кезексіз тыңдау – дұрыс әрі адамгершілікке сай деп есептеймін. Пікірлеріңіз бен реакцияларыңыз мен үшін өте маңызды. Жиында көтерілген әр сұрақты әкімдік пен министрлік назарға алды. Көпшілігіне сол жерде жауап берілді. Қосымша пысықтауды қажет ететін мәселелер хаттамаға енгізіліп, бақылауға алынды. Министрлікпен бірге бұл бағыттағы жұмысты жалғастырамыз”, – деп жазды ол. 

Сонымен бірге жағдайға Талғар ауданы әкімінің штаттан тыс кеңесшісі Марат Жапаров та пікір білдірді.

Оның сөзінше, кездесудегі жағдай әлеуметтік желіде дұрыс жеткізілмеген. 

Жапаровтың айтуынша, кездесу сағат 12:00-де басталуы тиіс болған, ал өзі 11:30-да келген. Өйткені оған ерекше қажеттігі бар азаматтар үшін министрмен жеке қабылдау болатыны алдын ала айтылған.

“Залға ертерек келдім, себебі бізге ерекше қажеттігі бар адамдар министрмен жеке қабылдауға қатыса алатынын айтқан. Кездесу 12:00-де басталды, бірақ бір жарым сағатқа созылды. Біраз уақыт өткен соң, ерекше қажеттігі бар азаматтарды бірінші қабылдауды сұрадым. Өйткені олардың жеке мәселелері болды, бәрінің көзінше айтуға ыңғайсыз жайттар бар еді”, – деді Жапаров.

Ол министр Ақмарал Әлназарова да, облыс әкімінің бірінші орынбасары Қанат Есболатов та бұл ұсынысты қолдағанын айтты. Алайда дәл сол кезде залда адамдар дауыстап сөйлеп, микрофонды бір-бірінен тартып алып, сөзді бөле бастаған.

“Құрметті келушілер, біз де күтіп отырмыз. Екі сағат болды, шаршадық, аяғымыз талып тұр” деп айттым. Осы сәтте Қанат мырза бір сөз айтты, бірақ ол сөздің мағынасы бұрмаланып кетті. Ол мүгедектігі бар адамдарға қарсы ештеңе айтқысы келген жоқ. Керісінше, алдымен бізді қабылдасын деген ниеті болды”, – деді ол.

Жапаровтың сөзінше, залда арбадағы екі азамат та болған. Олар да ұзақ күтіп шаршағандықтан, қабылдауға дейін залдан кетуге мәжбүр болған.

“Олар екі сағат күтті, шаршады. Біреулерінің памперсі ауыстыру керек болды. Сондықтан кетіп қалды. Сол үшін жағдай қиын болды”, – деді ол.