Күн салқындап, жаңбыр жауады: Елімізде қыркүйек айының басында ауа райы қандай болады

Қазақстанда жаз мезгілінің соңы мен күздің басында күн салқындап, жаңбыр жауады. 29 тамыз-2 қыркүйекке арналған ауа райы болжамын жасаған синоптиктер осылай деп отыр, деп хабарлайды Stan.kz ақпарат агенттігі «Қазгидромет» РМҚ-ға сілтеме жасап.

Мамандардың мәліметінше, Оралда орналасқан циклон Батыс Сібір арқылы, ал онымен байланысты атмосфералық фронттар Қазақстан арқылы жылжыйтын болады. Соның әсерінен еліміздің батыс және солтүстік облыстарында жаңбырлы және салқын ауа райы сақталады. 

Ал шығыс және оңтүстік-шығысқа суық және дымқыл ауа массаларының таралып, салдарынан Қазақстанның қалған аймақтарында найзағай ойнап, жаңбыр жауып, күшті ұйтқымалы жел соғады. Сонымен қатар температураның орташа көпжылдық мәннен 2-4°С-қа төмендеуі күтіледі.