Қостанай облысында жоғалған 7 жасар қыз бұталардың арасынан табылды
Қостанай облысы Тобылда жоғалған 7 жасар қыз бұталардың арасынан табылды, деп хабарлайды Stan.kz ақпарат агенттігі.
"21 тамыз күні кешкісін Қостанай облысының полиция департаментінің "102" пультіне Тобыл қаласының тұрғыны хабарласып, кәмелетке толмаған баласының жоғалып кеткені туралы хабарлады. 7 жасар қыз 20:50-де үйден белгісіз бағытта шығып кетіп, қайтып оралмаған. Ананың айтуынша, бұл бірінші жағдай емес",- деді полиция.
Хабарламаны алған жеке құрам дереу іздеуге кірісті. Жағдайлық штаб ұйымдастырылып, онда барлық күштер мен құралдар отбасының тұрғылықты жеріне іргелес барлық көшелерге қала бойынша таратылды.
"Жедел іздестіру шаралары барысында екі сағаттың ішінде бала табылып, отбасына тапсырылды", – деді директордың м.а. Қостанай облысының полиция департаментінің бастығы Мұхтар Жармұхамедов. Аладдин есімді іздеуші иттің көмегімен қыз үйден 900 метр жердегі бұталардың арасынан табылды. Белгілі болғандай, бала адасып кеткен.