"Көшпенділер қаласы" Қонаевтың жеке меншігіне өтті: Кешеннің алдағы күйі не болмақ

Фото: Қонаев қаласы әкімдігі

Шәкен Айманов атындағы “Қазақфильм” ұлттық киностудиясының қарамағында болған “Көшпенділер қаласы” декорациялық кешені ресми түрде сыйға беру шарты негізінде Қонаев қаласының меншігіне тапсырылды Бұл туралы Stan.kz ақпарат агенттігі хабарлайды. 

“Көшпенділер қаласының” аумағы 5,8 гектар, ол Іле өзенінің сол жағалауында орналасқан. Нысанның баланстық құны – 15,4 миллион теңге. Алайда пайдалану жылдары ішінде қалашық айтарлықтай ескіріп, кейбір құрылыс жарамсыз күйге түскен, бастапқы келбетінің бірқатар элементтері жоғалған”, – деп мәлімдеді Қонаев қаласының әкімдігі.

Қалалық мемлекеттік активтер және сатып алу бөлімінің дерегінше, нысан тұрғын үй-коммуналдық шаруашылық бөліміне бекітілді. Алдағы уақытта нысанды туристік бағытты дамыту, кешенді қаланың визиттік нысандарының біріне айналдыру жоспарланып отыр. Сондай-ақ кешенді күтіп ұстау мен жөндеуге бюджеттен қаржы қарастырылады.

“Инфрақұрылымды дамыту жұмыстары басталып кетті. “Көшпенділер қаласына” ұзындығы шамамен 7 шақырым болатын жаңа жол төселіп жатыр. Жоба аясында электр жеткізу желісін тарту, жол бойына жарық шамдарын орнату және автотұрақ ұйымдастыру қарастырылған. Жолдың ені – 7 метр, қозғалыс екі жолақты болады. Құрылыста 41 маман мен 24 техника жұмылдырылды. Жол құрылысы жыл соңына дейін аяқталуы жоспарланған”, – делінген әкімдік хабарламасында.