Шанхайда тұрып және білім алып жатқан қазақстандықтар азық-түлік тапшылығына тап болған. Мәселе локдаун бастала салысымен-ақ туындаған. Ал аудандар мен жеке тұрғын үй кешендерін жабу туралы шешім қабылданғанда, мәселе одан әрі ушыққан. Адамдар азық-түліктерді сатып алып, дүкен сөрелері бос қалған. Тұрғындарға бірнеше рет гуманитарлық көмек те берілген. Шанхай билігі көкөніс, дәрі-дәрмек және теңіз өнімдерін үлестірген. Иван Скрипченконың сөзінше, үйлерде күріш, ұн сынды қажетті өнімдер бар. Бірақ жеміс немесе ет сатып алу қиынға соққан.

"Азық-түлік сатып алу үшін таңғы 5-6 шамасында қосымшаны ашып, азық-түліктерді таңдап қою керек. Үлгеру үшін дүкен өз жұмысын бастаған сәтте тапсырыс беру батырмасын басасың", - дейді Иван Скрипченко.

Қалада симптомсыз коронавирус жұқтырғандарды оқшаулау орталығына орналастырады. Егер балада вирус анықталып, ата-анасында анықталмаса, баланы да орталыққа жібереді. Ал ата-анасына бірге баруға тыйым салынған.

"Бұрын тестті тұрғын үй кешені аумағынан шықпай тапсыратынбыз. Кейін тестті басқа жерден өтетінімізді айтты. Яғни кезекте тұрған уақытта 15 минут көшеде серуендеуге мүмкіндік бар", - деп қосты Иван Скрипченко.

Ал студенттерге жатақханадағы өз бөлмесінен шығуға да болмайды, бірақ университет қажетті азық-түлікпен қамтамасыз етеді екен. Таңғы, түскі және кешкі асты алып келеді. Тамақты еріктілер үлестіреді.

"Тамақ, маска және өзге де заттарды университетіміз береді. Күнделікті өзіміз тест тапсырамыз. Әзірге қашан аяқталатыны белгісіз", - деді Ботакөз Елшібек.

Қазақстандықтардың сөзінше, жаңа локдаун психологиялық тұрғыдан ауыр соғуда. Бұған қарамастан Қытайдағы отандастарымыз мессенджерде ортақ чат ашып, бір-біріне мүмкіндігінше көмек көрсетуде.

Талқылау