Қызылордада қызметтік міндеттерін орындау кезінде қаза тапқан жедел жәрдем қызметкерлері қайтыс болғаннан кейін марапатталды
Осы жылдың тамыз айында кезекші қызметін атқару кезінде қаза тапқан Қызылорда қаласының №5 қалалық емханаларының жедел жәрдем бөлімшесінің фельдшері Жадыра Омарова мен жедел жәрдем көлігінің жүргізушісі Бақытжан Маенов "Денсаулық сақтауды дамытуға қосқан үлесі үшін" төсбелгісімен қайтыс болғаннан кейін марапатталды. Бүгін екі марапат Қызылорда қаласына жеткізілді, деп хабарлайды Stan.kz ақпарат агенттігі.
"Марапаттар Омарова мен Маеновтың туыстарына табыс етілді", - деді Қызылорда облысының денсаулық сақтау басқармасы.
Естеріңізге сала кетейік, қайғылы оқиға 29 тамызға қараған түні Қызылордада мас жүргізушінің кінәсінен болған еді.
Қызылорданың орталық көшелерінің бірінде Toyota Land Cruiser жүргізушісі бағдаршамға тоқтап тұрған жедел жәрдем көлігін келіп соғады. Оқиға салдарынан жедел жәрдемнің екі қызметкері медициналық мекемеге жеткізіліп, олар алған жарақаттарынан көз жұмды.
- Актер Фархат Әбдірайымов қайтыс болғаннан кейін марапатқа ие болды
- Тұрғымбаев Алматыдағы атыстан қаза болған полицейлердің отбасыларына мемлекеттік марапатты табыс етті
Айта кетейік, жол апатына кінәлі жүргізуші бұған дейін жүргізуші куәлігінен айырылып, құжатсыз көлік айдаған.
"Бұл азамат Қызылорда қалалық мамандандырылған әкімшілік сотының 2016 жылғы қарашадағы қаулысымен 5 жылға көлік құралын басқару құқығынан айырылған", – деп мәлімдеген Қызылорда облысының полиция департаменті.
Енді ол көлік құралдарын басқару құқығынан айырылған және алкоголь немесе есірткі қолданған күйде көлік құралын басқарғаны үшін ұзақ уақыт түрмеге тоғытылуы мүмкін. Бұл заң бұзу бойынша Қазақстанның Қылмыстық кодексінде 8 жылдан 10 жылға дейінгі мерзімге бас бостандығынан айыру түріндегі санкциялар қарастырылған.