Қытай Қазақстанға еш зиян келтірмейді – Тоқаев

Фото: unsplash.com

Мемлекет басшысы Қасым-Жомарт Тоқаев Қазақстан көрші мемлекеттермен достықты нығайта түсуге айрықша көңіл бөлетінін айта келе, Қазақстанның Қытаймен, Ресеймен, өзге де көршілерімен достығы бекем екенін атап өтті. Бұл туралы Stan.kz ақпарат агентті хабарлайды.

"Қазақ қашанда көршісін қадірлей білген. Қуанышта да, қиындықта да көршісіне сүйенген, көршінің қасынан табылған. "Көрші ақысы – тәңір хақысы" деген ұғым дінімізде және дәстүрімізде бар. Бұл – бізге атадан қалған өсиет, анадан берілген қасиет. Халқымыздың тату көршілік дәстүрі әлі де жалғасып келеді. Қоныстас адамдар ұлтына, дініне, тіліне қарамастан араласып, құраласып жатады. Қазақстан көрші мемлекеттермен достықты нығайта түсуге айрықша мән береді”, – деді Тоқаев.

Бұл ретте мемлекет басшысы Ресей – Қазақстанның негізгі стратегиялық серіктесі екенін, ал Қытайдан еш зиян келмейтінін атап өтті.

“Ресей – Қазақстанның бұрыннан келе жатқан негізгі стратегиялық серіктесі әрі сенімді одақтасы – Қытай елімен ықпалдастық тамыры да тереңде жатыр. Қытай халқы қазақ халқына ешқашан зиян келтірген жоқ, болашақта да зиян келтірмейді”, – деді ол.

Сонымен қатар Тоқаев Қазақстанның Қырғызстанмен, Әзірбайжанмен, Өзбекстанмен, Тәжікстанмен арадағы қарым-қатынасына тоқталып өтті.

“Алатауды тең жайлаған қырғыздар – бір туған бауырларымыз. Ежелден еншілес өзбек ағайынды өз ағам деп қадір тұтамыз. Түбіміз бір деп түрікмендерді туыс санап, шын жүректен құрметтейміз. Қарт Каспийдің жағасындағы әзербайжан еліне деген ықыласымыз да ерекше. Бір сөзбен айтсақ, көрші елдермен қарым-қатынасымыз бауырластық рухында дамып келеді. Біздің арамызда түйткілді мәселе жоқ. Қазақстан мен Ресей құрлықтағы ең ұзын шекараны әуел бастан дау-дамайсыз шегендеп алды. Жақында Қырғызстан, Өзбекстан және Тәжікстан ұзақ жыл бойы шешімін таппаған шекара мәселесі бойынша ортақ мәмілеге келіп, тарихи келісімге қол қойды деп айтуға болады. Біз бауырлас елдер үшін қуанамыз, оларды әрдайым қолдаймыз”, – деп мәлімдеді президент.

Осы орайда президент былтыр Ақтау маңында болған ұшақ апатын еске салып, халқымыз зардап шеккен адамдардан көмегін аямағанын айтып өтті.

“Қазіргідей аумалы-төкпелі заманда ауызбіршіліктің қадірі арта түскені сөзсіз. Бейбітшілік пен тұрақтылық – тағдырдың бізге бере салған сыйы емес. Бұл – бір ел, бір халық болып атқарып жатқан қажырлы еңбектің жемісі. Біз сындарлы сәтте жұрт болып жұмыла білеміз. Бұған былтыр Ақтау маңында ұшақ апаты болғанда тағы бір мәрте көзіміз жетті. Азаматтарымыз зардап шеккен адамдардан көмегін аяған жоқ. Кезекке тұрып, қан тапсырды. Әзірбайжан Елшілігіне барып, гүл шоқтарын қойды. Бүкіл әлем халқымыздың ұйымшылдығы мен жанашырлығына тәнті болды. Халқымыздың жүрегі – кең, пейілі – ақ, ниеті – таза. Мейірімділік, қамқорлық және тілеулестік – біздің ұлттық ерекшелігіміз”, – деді ол.

Президент “осы құндылықтарымызды сақтап, өскелең ұрпақтың бойына сіңіруіміз керек" екенін атап өтті.