Мамыр айында Қазақстанның 11 өңірінде құрғақшылық болады – Экология министрлігі

Фото: pixabay.com

"Қазгидромет" алдағы маусымда Қазақстанның оңтүстік және батыс өңірлерінде жауын-шашын тапшылығында құрғақшылық болуы мүмкін екенін болжады. Осыған байланысты үкімет отырысында су ресурстары министрі Нұржан Нұржігітов өңірлер әкімдіктерін, ауыл шаруашылығы министрлігін, бассейндік инспекциялар мен "Қазсушар" филиалдарын шұғыл шаралар қабылдауға шақырды. Бұл туралы Stan.kz ақпарат агенттігі хабарлайды. 

Құрғақшылық бойынша болжамдар Дүниежүзілік метеорологиялық ұйымның және Солтүстік Еуразиялық климаттық орталықтың деректерімен расталады. Құрғақшылықтың болу кезеңі мамырдан шілдеге дейін.

Қауіп бірінші кезекте Жайық және Сырдария өзендерінің бассейндеріне төніп тұр. Бұл аграрлық сектор үшін елеулі қиындықтар туғызуы мүмкін.

"Ылғал тапшылығының салдарын барынша азайтуға бағытталған жедел шаралар кешенін пысықтау қажет. Мамыр айында Қостанайдың оңтүстігінде, Батыс Қазақстан және Маңғыстау облыстарының оңтүстік-батыс жартысында, Қызылорданың солтүстік-батыс бөлігінде, Алматы және Жамбыл облыстарының солтүстігінде, Қарағанды облысының оңтүстігінде, сондай-ақ Ақтөбе, Атырау, Абай және Түркістан облыстарының жекелеген аудандарында құрғақшылық болжанады", – деп хабарлады Экология министрлігінің басшысы.

Оның мәліметінше, маусым айында Қазақстанның басым бөлігінде орташа айлық ауа температурасы норма шегінде – елдің солтүстігінде және орталығында +17+20 °С-тан, батыста +23+25 °С-қа дейін болады. Ал оңтүстік-батыс пен оңтүстікте ауа райы әдеттегіден ыстық болады. Жазда ауаның максималды температурасы + 45 °С жетеді.

• Ғалымдар жаһандық жылынуға әлемнің байларын кінәлады 

• Қазақстан тарихындағы ең ыстық жыл белгілі болды

Түркістан және Қызылорда облыстары ерекше алаңдаушылық туғызып отыр. Министрдің айтуынша, 6 мамырдағы жағдай бойынша бұл бассейндегі су қоймаларының орташа толу деңгейі – небәрі 75%.

Еске салсақ, мамыр айында Қазақстанның бірнеше өңірінде құрғақшылық болатыны туралы хабарлаған едік.