Қазақстандықтарға референдум өтетіні туралы хабарлама келуде: Полицейлер жалған ақпарат таратқандарды ұстап жатыр
WhatsApp желісінде Қазақстан халқы ассамблеясының алдағы сессиясында референдум өткізілетіні туралы ақпарат тарап жатыр. Мұнда Қазақстанның Ресейге одақтас ел болуы туралы талқыланатыны айтылған. Алайда ведомство бұл ақпараттың жалған екенін және таратып, алауыздықты тудырмақ болғандардың жауапқа тартылатынын жеткізді. Бұл туралы Stan.kz ақпарат агенттігі хабарлайды.
Фото: pixabay.com
Қарағанды полициясы фейк таратушыларды ұстағаны туралы мәлімдеді. Олар әкімшілік жауапкершілікке тартылған.
"Әлеуметтік желілерде Қазақстан халқы ассамблеясының сессиясында референдум өткізу туралы жалған ақпарат таратылып жатыр. Қарағанды облысының полиция қызметкерлері жалған ақпарат таратқаны үшін облыстың екі тұрғынын анықтап, ұстады және әкімшілік жауапкершілікке тартты. Тексеру жалғасып жатыр. Жалған ақпарат таратқан қалған адамдар да жауапқа тартылады", – делінген полиция хабарламасында.
Ведомство азаматтарды тек ресми дереккөздерге сенуге шақырды. Таратылымға Қазақстан халқы ассамблеясы төрағасының орынбасары Лугмар Буларов та жауап берді.
"ҚХА төрағасының орынбасары ретінде мұның мүлде жалған және арандатушылық ақпарат екенін ресми түрде мәлімдеймін. Мен ассамблеяның алдағы сессиясын және оның 30 жылдығын дайындау процесіне тікелей қатыстым. Сондықтан мұндай мәселе тіпті талқыланбайды деп сенімді түрде айта аламын.
Ассамблеяда мұндай өкілеттіктер ешқашан болған емес және болмайды. Мұндай фейктерді елімізді арандатушылар таратады. Қазақстандықтардан мұндай ақпаратқа сенбеуін сұраймын", – деп жазды Лугмар Буларов.