Қазақстандықтар ұялы байланыс тарифтерінің тағы қымбаттағанын айтып шағымдануда

Фото: depositphotos.com

Әлеуметтік желіде қолданушылар Altel және Beeline мобильді операторларының тарифтерінің қымбаттайтынын жазып, шағымдануда. Бұл туралы Stan.kz ақпарат агенттігі хабарлайды. 

Абоненттердің айтуынша, Altel-дің ең танымал тарифтерінің бірі шамамен бір жарым есеге қымбаттамақ.

11 қарашадан бастап “Ерекше” тарифінің 2 990 теңгеден 4 390 теңгеге дейін қымбаттайтыны белгілі болды. Алайда, тариф аясында берілетін гигабайттар мен қоңыраулар көлемі де ұлғаятын көрінеді.

“Алтел танымал тарифінің бағасын 100 пайызға өсірген”, “Тура осы тариф бойынша бағаның өскеніне бес ай болды” – деп жазды желідегілер.

Фото: Әлеуметтік желіден

Beeline клиенттері де үй интернетінің бағасы өскеніне шағымдануда. Олардың айтуынша, үш жыл бұрын тариф 5 500 теңге болса, желтоқсаннан бастап 21 500 теңгеге дейін өседі.

“Үш жыл бұрын бұл тарифті 5 500 теңгеге қосқанмын, кейін 8 590 теңгеге көтерді. Бәрі қымбаттап жатыр ғой, жарайды, ешнәрсе етпес дедім. Кейін тағы 11 590 теңгеге дейін өсті. Менің ойымша, бұл интернет үшін шекті баға еді, бірақ желтоқсаннан бастап 21 500 теңге болады”, – деп жазды қолданушылардың бірі.

Beeline компаниясы бұл шағымға тез арада жауап берді. Компания өкілдерінің айтуынша, кейбір клиенттерде “Үйдегі интернет” бойынша абоненттік төлем мөлшері дұрыс көрсетілмеуі мүмкін. Бұл жағдайды жақын уақытта түзетуге уәде берілді.

Еске салсақ, осыған дейін қосылған құн салығының көтерілуіне байланысты ұялы байланыс тарифтері 20% қымбаттайтынын жазғанбыз.