Елімізде бір оқушыға берілетін тегін ыстық тамақтың орташа құны – 579 теңге. Сонымен қатар, баға әр аймақта әртүрлі. Оны әкімдік азық-түлік өнімдерін сатып алу бағасына қарай қалыптастырады.

Қызмет көрсетуші электрондық конкурс арқылы таңдалады. Төмендегідей талаптарға сай болу керек:

АЕК-тің алты еселенген мөлшерінен асатын салық берешегі болмауы тиіс (2023 жылы – 3450 теңге);
Банкроттық немесе тарату (ликвидация) рәсімінен өтпеуі тиіс;
Материалдық және еңбек ресурстары болуы керек.

2022 жылдың 10 тамызында талаптарға толықтырулар енгізілді. Енді жеткізушілер мыналарды қамтамасыз етуі керек:

тағамдардың атауын, тағам порциясының массасын граммен, ыдыс-аяқтың ингредиенттерін (граммен) көрсете отырып, білім беру органы бекіткен ас мәзірінің перспективалық схемасы;
шырындарды, сусындарды, бөтелкедегі суды қоса алғанда, тағамдардың, буфет өнімдерінің ассортимент тізімі. Осының барлығын тапсырыс беруші бекітуі керек, өнім бағасының базасы бойынша бір бірлікке орташа бағаны ескере отырып, әрбір тағамның бағасы болуы керек;

Министрліктің мәліметінше, мектептердегі тамақтың сапасын, құрамында қамқоршылық кеңесі, ата-аналар комитеті, мектеп әкімшілігі, медицина қызметкерлері бар комиссия қадағалап отыруы керек. Олар азық-түлік өнімдерінің сапасын, ыдыс-аяқ сапасын, технологиялық жабдықтың болуы мен оның жарамдылығын, сақтау мерзімі мен шарттарын сақтауды, өнімді жеткізуді, сақталуын, ас мәзірінің өзгермеуін, асхананың санитарлық жағдайын бақылауы тиіс.

Осы тұста биыл сотталған немесе қамауға алынғандарға берілетін тамақтың бір адамға шаққандағы шығыны 2235 теңге екенін айта кетейік. Түрмедегіні тамақтандыруға ай сайын 68 мың теңге, ал жылына 816 мың теңге жұмсалады. Сотталғандардың бір күндік тамақтану шығынын үшке бөлсек 745 теңге шығады.

Естеріңізге сала кетейік, бір оқушының күніне бір рет тамақтануы үшін мемлекеттік бюджеттен 579 теңге, ал сотталған азаматқа 745 теңге жұмсалады. Яғни, оқушылардың түскі асы түрмедегілердің түскі асына қарағанда 166 теңгеге арзан.

Ал СҚО полиция департаменті 20 қызметтік-іздестіру иттерін тамақтандырғаны үшін жылына 2 734 500 теңге жұмсаған. 2023 жылы бір итке 510 грамм азық белгіленген. Иттер күніне екі рет азықпен қамтамасыз етіледі.

Республикалық балалар-жасөспірімдер туризмі және демалыс қауымдастығының төрағасы Қайрат Сұлтанов лагерьлердің проблемасы туралы сұхбатында иттер мен мысықтар үшін тәулігіне 1500 теңгеге тамақ төлеу ұсынылғанын атап өткен еді. Оның айтуынша, қызметтік иттерді тамақтандыруға жұмсалатын шығындар тәулігі – 5500 теңге.

Айта кетейік, бұған дейін Алматыда тоғыз жылдан бері оқушыларға шала піскен ет пен күйген котлет беріліп келгенін хабарлаған едік.

Талқылау