Қазақстандық әуе компаниялары бұрынғы ұшу кестесі бойынша рейстерді қайта қалпына келтірді
Фото: pixabay.com
Көлік министрлігінің Азаматтық авиация комитеті Қазақстанның Airbus ұшақтарына арналған бағдарламалық қамтамасыз етуді жаңартуды толық аяқтағанын мәлімдеді. Бұл туралы Stan.kz ақпарат агенттігі хабарлайды.
Министрлік қазіргі таңда Airbus ұшақтары барлық талаптарға толық сай келетінін және олардың қалыпты режимде жұмыс істеп тұрғанын түсіндірді.
"Airbus компаниясының 28 қарашадағы директивасына сәйкес, қазақстандық әуе компаниялары пайдаланатын Airbus ұшақтарында бағдарламалық қамтамасыз етуді жаңарту толық аяқталды", – делінген ресми хабарламада.
Ведомствоның мәліметінше, Азаматтық авиация комитеті, Қазақстанның авиациялық әкімшілігі, әуе компаниялардың инженерлік-техникалық құрамдары және елдегі әуежайлар барлық қажетті жұмыстарды жедел жүргізіп, авиациялық процестердің үздіксіз жұмысын және жоғары қауіпсіздік стандарттарының сақталуын қамтамасыз еткен.
Ал Air Astana тобы өз жағынан 38 Airbus ұшағында бағдарламалық қамтамасыз ету толық жаңартылғанын хабарлады.
"Air Astana тобы Airbus ұшақтарындағы бағдарламалық қамтамасыз етуді жаңарту жұмыстары аяқталғанын және әуе компаниялары қалыпты ұшу кестесіне қайта оралғанын мәлімдейді", – делінген хабарламада.
Еске салсақ, бұған деййін мыңдаған Airbus ұшақтарынан ақау анықталып, кей рейстер кешігіп, кейбірі тоқтатылған болатын.
"30 минутқа созылады, тез келемін деген еді": Астанада көзіне лазерлі ота жасатуға барған жалғызбасты ана қаза тапты
