Жартысы балалар үшін: Депутаттар ұлттық қорды екіге бөлу туралы ұсыныс айтты

Мәжіліс отырысында ҚР Ұлттық қорын екіге бөлу туралы ұсыныс түсті, деп хабарлайды Stan.kz ақпарат агенттігі.

Бұл бастаманы мәжіліс депутаты Аманжан Жамалов көтерді. Ол Ұлттық қор кірісінің 50 %-ын жас қазақстандықтарға жіберу туралы ұсыныс халық тарапынан үлкен қолдауға ие болғанын атап өтті.

Сонымен қатар, депутат Ұлттық қор қаражатын түрлі мемлекеттік бағдарламаларға және республикалық бюджет тапшылығын жабу үшін пайдалану "инвестициялық табысты арттыру" саясатына қайшы келетінін айтты.

"Ұлттық қордан ақша ала отырып, үкімет инвестициялық табысты қысқартатын болады. Сондықтан ұлттық қорды екі қорға бөлу - ықтимал нұсқа. Біріншісі - "резервтік қор". Оны  бюджет қажеттіліктерін қаржыландыру үшін пайдалануға болады. Екіншісі - "Балаларға арналған Ұлттық қор", оған Ұлттық қор активтерінің 50 пайызы беріледі және әр бала үшін арнайы шот ашылады. Оларға инвестициялық кірістер бөлінетін болады. Бүгінде Ұлттық қорға түсетін барлық мұнай кірістері осы қорлар арасында тең бөлінеді", - деді Мәжіліс отырысында депутат Жамалов.

Сонымен қатар, депутат кез келген инвестициялық табыстың тұрақсыз екенін жеткізді.

"2001 жылдан бастап біздің ұлттық қорымыздың жылдық орташа кірісі 3,7 пайызды құрады. Бірақ Ұлттық қордың шығынға ұшырағанына кемінде 5 жыл болды. Бұл 2002, 2008, 2014, 2015, 2018 жылдарда болатын. Ұлттық қордың активтерін инвестициялық басқару үшін тиімділік пен жауапкершілікті елеулі түрде арттыру қажет.

Бұл үшін үкімет пен ұлттық банк балаларға ұлттық қордың активтерін орналастыру кезінде тәуекелдерді әртараптандыру және азайту жөніндегі талаптарды белгілей отырып, нормативтік-құқықтық актілер әзірлеуі қажет. Осы нормативтік-құқықтық актілерде қордың активтері есебінен сатып алынатын қаржы құралдарының тізбесі көрсетілуі, сондай-ақ инвестициялық декларация әзірленіп, бекітілуі тиіс", - деп мәлімдеді Жамалов.

Президент өз жолдауында Ұлттық қордың жыл сайынғы инвестициялық табысының 50 пайызын балалар кәмелеттік жасқа толғанға дейін арнайы жинақтаушы шоттарға аудару бастамасын ұсынды. Жинақталған сома тұрғын үй сатып алуға және білім алуға бағытталатын болады.

Арнайы шоттар  2024 жылы осы норма заңды күшіне енген кезде 18 жасқа толмаған қазақстандық балалардың атына ашылады. Аударымдар олар кәмелетке толғанға дейін жүргізіледі. Сондай-ақ, шоттар шетел валютасында болады және жинақтық пайыздар есептеледі.