Қазақстанда спорт университетін ашу жоспарланып жатыр
Қазақстанда спорт университеті пайда болады. Алдағы бірнеше жылда Қазақстанда спорт университетін ашуды жоспарлап отыр.
Бұл туралы баспасөз мәслихаты барысында мәдениет және спорт министрлігі спорт және дене шынықтыру істері комитетінің төрағасы Серік Сәпиев айтты.
«Болашақта біздің елімізде Спорт университетін құру жоспарлануда. Спортшыларды барлық салада дайындауға байланысты факультеттер, түрлі бағыттар болады », - деді Сәпиев.
Оның айтуынша, қазір тиісті департамент спорт университетін ашудың техникалық-экономикалық негіздемесін әзірлеп жатыр және басқа мемлекеттік органдармен келісу үстінде.
«Сондықтан мәселе әлі де ашық, біз оны әзірледік, ұсыныстар енгізіп жатырмыз. Мәселе шешілуде», - деп түсіндірді ол.
Комитет басшысы атап өткендей, егер елімізде спорт университетін ашу идеясы қолданылса, алдағы екі-төрт жылда республикада жаңа университет пайда болады.