Бұл туралы бас прокуратураның үйлестіру кеңесінің отырысында айтылды. Прокуратураның мәліметінше, қайтыс болған адамдардың атына немесе биометриядан өтпей-ақ микронесиелер рәсімделген жағдайлар кездескен. Сонымен қатар, елімізде мүлдем болмаған шетел азаматтарының атына да несиелер берілген. Осындай жолмен ашылған банктік шоттар арқылы көптеген алаяқтық операциялар жасалған.

"Танысымның қарызы үшін коллекторлар мені мазалайды": Бөтен адамның несиесі бойынша сізге қоңырау шалса, не істеу керек?

"Мысалы, Ақтөбе облысында "Кредит 365 Қазақстан" және "Авто Сыйлық" микрокаржылық ұйымдары азаматтың биометриясынсыз-ақ микронесие рәсімдеген. Алайда ол азамат 2023 жылдың шілде айында қайтыс болған",– делінген ақпаратта.

Батыс Қазақстан облысында екінші деңгейлі банктің екі қызметкеріне қатысты тергеу жүргізіліп жатыр. Олар Қазақстанға ешқашан келіп көрмеген Украина азаматының атына шот ашқан. Осы шотқа алаяқтардың құрбандары жинақтарын аударған. Залал көлемі 1 миллион теңгені құрады. Бүгінгі таңда банк қызметкерлері өкілеттіктерін асыра пайдалану бойынша күдікті деп танылды.

Сонымен қатар, "Beeline", "Tele2" ұялы байланыс операторлары мен олардың дистрибьюторларының қызметкерлеріне қатысты төрт іс қозғалды.

"Оларға Батыс Қазақстан облысында екі, Қарағанды мен Алматы қалаларында бір-бірден Қылмыстық кодекстің 211-бабы “Шектеулі қолжетімді электрондық ақпараттық ресурстарды заңсыз тарату” және 254-бабы “Міндеттерге адал қарамау" бойынша айып тағылды. Олар алаяқтарға мыңдаған SIM-карталарды тіркеуге көмектескен, бұл карталар азаматтарды алдау мақсатында пайдаланылған", – деп мәлімдеді бас прокуратура өкілдері.

Еске салсақ, қазақстандықтардың өздерін Болашақ пен ҰҚҚ қызметкері ретінде таныстырған алаяқтарға алданып жатқаны туралы жазғанбыз.

Талқылау