Қазақстанда қарттарға көмек көрсету бүкіл қазан айында жалғасады

Фото: pixabay.com

Еңбек және халықты әлеуметтік қорғау министрлігі Қазақстанда 1 қазанда Қарттар күніне арналған іс-шаралар кешені басталғанын мәлімдеді. Бұл туралы Stan.kz ақпарат агенттігі хабарлайды.

Осы кезеңде әкімдер, кәсіпорындар мен ұйымдардың жетекшілері қарт тұрғындарға әлеуметтік қолдау көрсетеді, еңбек ұжымдарында кездесулер ұйымдастырады және амбулаториялық-емханалық ұйымдарда "ашық есік күндерін" өткізеді.

Қазір елде 2,5 миллионнан астам зейнеткер бар.

"1 қаңтардан бастап бірлескен зейнетақылар көлемі 8,5%-ға көбейтілді. Негізгі зейнетақының көлемін кезең-кезеңімен көтеру жалғасып жатыр. 2025 жылғы 1 қаңтардан бастап оның минималды көлемі күнкөріс минимумының 65%-дан 70%-ға, ал максималды көлемі 105%-дан 110%-ға өсті", – деп еске салды министрлік.

2025 жылы жергілікті бюджеттен 127 белсенді ұзақ өмір орталығының жұмысына 7,5 миллиард теңге бөлінді. Ұйымдар үш бағытта, яғни белсенді ұзақ өмір, денсаулық мәдениеті және қоғаммен байланыс жұмыс істейді.

Қазақстанда ең ұзақ жасайтын қарттар саны көп өңірлер аталды

БҚО-да шенеуніктер "Кәрілер күніне" тендер жариялаған

Еске салайық, бұған дейін Қазақстанда қарттар күніне орай 29 мың теңгеге дейін бір реттік төлем берілетінін жаздық. Өңірлерде зейнеткерлерге қолдау әртүрлі: біржолғы ақшалай төлемдер, мерекелік шаралар және әлеуметтік қызметтер арқылы көрсетіледі. Мысалы, Астана мен Шымкентте 9-12 мың теңге, Атырауда 29 мың теңге, Қарағанды мен Маңғыстауда 10-20 мың теңге төленеді. Ақтөбеде біржолғы төлем жоқ, тек шаралар ұйымдастырылады. Барлық өңірде қайырымдылық акциялары өткізіледі.