Қазақстанда ер балаларға папиллома вирусына қарсы вакцинация жүргізу жоспарланып отыр
Қазір елімізде жатыр мойны обырының негізгі қоздырғышы болып саналатын адамның папиллома вирусына қарсы вакцинация қыздарға ғана салынып жүр. Енді бұл вакцинация ер балаларға салынуы мүмкін. Бұл туралы Stan.kz ақпарат агенттігі хабарлайды.
Фото: Ru.freepik.com
Денсаулық сақтау министрлігінің Ұлттық қоғамдық денсаулық сақтау орталығы басқарма төрағасының орынбасары Манар Смағұл адамның папиллома вирусына қарсы вакцинацияға арналған іс-шара барысында вирусқа қарсы екпенің басқа мемлекеттерде оң нәтиже көрсетіп жатқанын айтты.
“Адамның папиллома вирусына қарсы вакцина клиникалық сынақтан өтіп, 2007–2008 жылдары АҚШ, Австралия және Канада мемлекеттерінде енгізілді. Бұл елдерде вакцинацияның оң әсері байқалып отыр. Өйткені ауру деңгейі мен вирус таралуы төмендеді. Қазір осы елдерді қосқанда 76 мемлекет ер балаларға да вакцинация жүргізіп жатыр. Себебі ерлер де вирусты тасымалдаушы болуы мүмкін”, – дейді Манар Смағұл.
Оның айтуынша, Қазақстанда адамның папиллома вирусына қарсы төртвалентті вакцина қолданылады. Сондай-ақ ол Қазақстанда ер балаларға да вакцинация жүргізу жоспарда бар екенін айтып қалды.
“Ер балаларға вакцина салу жоспарда бар. Себебі вакцинация онкологиялық аурулардың алдын алуда тиімділігі жоғары екенін көрсетті. Вакцинацияның қашан басталатынын айта алмаймыз”, – деді Манар Смағұл.
Былтыр қыркүйек айында Қазақстанда папиллома вирусына қарсы қыздарды вакцинациялау басталған еді. Бас мемлекеттік санитар дәрігердің 2024 жылғы 17 қыркүйектегі №11 қаулысына сәйкес, 11 жастағы қыздар жоспарлы тәртіппен вакцинациялаудан өту керек болды. Сондай-ақ 12 жастан бастап 13 жастағы қыздарға иммундау жүргізілетіні айтылды.