Қазақстанда электрондық сандық қолтаңбаның баламасы енгізіледі
Қазақстанда электрондық сандық қолтаңбаға балама болатын Face ID жүйесі енгізіледі. Цифрлық даму, қорғаныс және аэроғарыш өнеркәсібі министірінің орынбасары Абылайхан Оспановтың сөзінше, тұлғаны бет-әлепті арқылы сәйкестендіретін жүйе алдағы үш ай көлемінде енгізілетін болады, деп хабарлайды Stan.kz ақпарат агенттігінің тілшісі.
Вице-министр бүгінгі тағда электрондық сандық қолтаңбаны алу процедурасын жеңілдету және мемлекеттік қызметтерді ЭСҚ-сыз алуға мүмкіндік беретін балама әдістерін дайындау бойынша жұмыстар жүргізіліп жатқанын айтты. Оспановтың сөзінше, ЭСҚ-ны ұялы телефонға бір рет жүктеп, оның қолданылу мерзімін ХҚКО-ларда ұзартуды қажет етпейтін әдіс дайындалуда.
«Егер ЭСҚ-ны телефонға орнатып алсаңыз, Face ID-ді телефонға байлау мүмкіндігін береміз. Осылайша, сіз өзіңізде ЭСҚ барын ұмытасыз. Телефонды бетіңізге жақындатқан бойда ол автоматты түрде барлық сауалдарды растайтын болады», - дейді Оспанов.
Сондай-ақ вице-министр жаңа жүйенің алдағы үш ай көлемінде енгізілетінін айтты.
Еске сала кетсек, бұған дейін ҚР мемлекеттік қызмет істері агенттігінің басшысы Анар Жайылғанова ЭСҚ-ның мемлекеттік қызметтерді алуды қиындататынын айтқан еді. Осы себепті оны міндетті түрде пайдалану шартынан біртіндеп шығара бастайды.