Қазақстанда 1 миллиард долларға дейін ұлттық криптовалюта қоры құрылады

Фото: Ұлттық банк

Ұлттық банк басшысы Тимур Сүлейменов Bloomberg агенттігіне берген сұхбатында Қазақстан 500 миллион доллардан 1 миллиард долларға дейін ұлттық криптовалюта қорын құрып жатқанын мәлімдеді. Оның айтуынша, қор баламалы инвестицияларға арналған қаражаттан және ішінара тәркіленген активтерден қалыптасады. Бұл туралы Stan.kz ақпарат агенттігі хабарлайды.

Ұлттық криптофонд "криптовалюталарға тікелей инвестиция салуға қатысты өте сақ болады," - деді Сүлейменов. Оның айтуынша, қор биржалық қорларға және цифрлық валюталарға қатысты компаниялардың акцияларына инвестиция салады.

"Жыл соңына қарай, келесі жылдың қаңтар айында біз жобаны іске қосуға дайын боламыз деп ойлаймын, - деді ол. - Бәрі жұмысқа дайын."

Сұхбат Лондонда өтті. Сол күні, 5 қарашада Bloomberg алаңында Kazakhstan Capital Markets Day 2025 іс-шарасы өтті. Ол қаржы секторын дамыту перспективаларын талқылауға, макроэкономикалық тұрақтылықты нығайтуға және жаһандық аренада Қазақстанның инвестициялық әлеуетін ілгерілетуге арналды, деп Қазақстанның Ұлыбританиядағы елшілігінің баспасөз қызметі хабарлады.

Сүлейменов іс-шарада негізгі баяндама жасап, Қазақстанның макроэкономикалық шолуын ұсынды. Ол республика инвестиция, инновация және жаңа әріптестік үшін ашық екенін атап өтті.

Айта кетсек, 29 қыркүйекте Қазақстанда Жасанды интеллект және цифрлық даму министрлігі құрған Alem Crypto Fund криптофонды жұмыс істей бастады. Alem Crypto Fund-тың стратегиялық серіктесі Binance Kazakhstan криптобиржасы болды. Қор алғашқы инвестиция –  BNB токендерін сатып алу туралы есеп берді.