Қаржы министрлігі Жеке табыс салығын төлеуден кімдер босатылатынын айтты

Фото: Stan.kz

Қаржы министрлігінің Мемлекеттік кіріс комитеті қандай қазақстандықтар жеке табыс салығын төлеуден босатылатынын айтты. Бұл туралы Stan.kz ақпарат агенттігі хабарлайды.

Жеке табыс салығы – табысыңыздан, мысалы, жалақыңыздан төленетін салық.

Жаңа Салық кодексінде 30 ең төменгі айлық есептік көрсеткіш мөлшеріндегі базалық шегерім қарастырылған. 2026 жылы бұл сома күнтізбелік айда 129 750 теңге болады. Демек жеке тұлға салық салынатын табысын осы сомаға азайта алады.

“Айына шамамен 145 000 теңге табыс табатын адамдар жеке табыс салығын төлемейді”, – деді Мемлекеттік кіріс комитетінің Салық әдіснамасы департаменті басшысының орынбасары Айгүл Аббасова.

Айлық табысы 3 миллион теңгеден асатын жеке тұлғалар 15 пайыз жеке табыс салығын төлеуге міндеттеледі

2026 жылдан бастап зейнетақы жинағынан жеке табыс салығы алынбайды: Кей азаматтар бұған дейін төлеген салығын қайтара алады

Негізгі шегерім – жеке табыс салығын есептемес бұрын салық салынатын табысты азайтуға болатын сома. Басқаша айтқанда, үкімет: “Біз сіздің табысыңыздың бұл бөлігін салық салу мақсатында табыс ретінде қарастырмаймыз” дейді.

Айгүл Аббасованың айтуынша, бұл өзгерістер жоғары табысты қазақстандықтарға да қатысты.

“Жаңа Салық кодексі салық салуда әділдікті көздейді. Табысы төмен азаматтар Жеке табыс салығын төлемейді. Ал жылына 36 миллион теңгеден жоғары, яғни айына шамамен 3 миллион теңге табыс табатындар салықты жоғары мөлшерлемемен төлейді. Демек, 36 миллион теңгеге дейін салық мөлшерлемесі 10% болады”, – дейді Аббасова.

Егер табыс 36 миллион теңгеден асса, жеке табыс салығының мөлшерлемесі артық соманың 15%-ы болады.

Қарапайым есеп: 

Егер адамның жалақысы 145 000 теңге болса, олар 129 750 теңгені алып тастайды. Демек, қалған бөлігіне ғана салық салынады:

145 000 теңге – 14 500 теңге (міндетті зейнетақы жарналары) - 2 900 теңге (міндетті медициналық сақтандыру жарналары) - 129 750 теңге (30 ең төменгі айлық есептік көрсеткіш) = 0 теңге.

Егер адам жылына 38 миллион теңге тапса, онда салық жаңа ережеге сәйкес төленеді:

36 000 000 теңгеге дейін – мөлшерлеме 10 пайыз;

бұл сомадан жоғары — 15 пайыз.

Есептеу:

36 000 000 теңге × 10 пайыз + 2 000 000 теңге (артық сома, 38-36) * 15% = жылына 3 900 000 теңге.

Айта кетейік, бұған дейін Қазақстанда БЖЗҚ-дан төленетін зейнетақы төлемдерінен жеке табыс салығын ұстау тоқтатылатынын туралы айтқан едік.