Қарағанды облысы жастар ресурстық орталығының директоры Аида Сайынның айтуынша, өңірде 2023 жылдың I тоқсанындағы жағдай бойынша, 73 еріктілер ұйымы мен топтар жұмыс істейді. Олардың қызметіне облыстың 4,5 мыңға жуық тұрғыны, негізінен жастар қатарынан тартылған.

“Біздің облысымыздағы ең белсенді волонтерлік ұйымдар ретінде Теміртау қаласындағы "Шаңырақ" волонтерлік орталығын, "Біз Шахтинск қаласынанбыз" волонтерлер қауымдастығын, Қарқаралы ауданының "JasStar" волонтерлер лигасын атай аламын. Олар азық-түлік жиынтықтарын тарату бойынша акциялар, экологиялық сенбіліктер, шырша көшеттерін отырғызу бойынша экологиялық акциялар, жастарға арналған білім беру тренингтерін және тағы басқа шараларды тұрақты негізде ұйымдастырады”, – дейді Аида Сайын.

Облыстағы волонтерлік қызметтің негізгі бағыттары – қайырымдылық және әлеуметтік көмек. Сондай-ақ зияткерлік, кибер -, зоо- және эковолонтеризм бар.

“Еріктілер тобы мен ұйымдарды қолдау үшін, еріктілер мен ұйымдарды тіркеу мүмкіндігі бар жеделхат-бот іске қосылған. Ол волонтерлік жобаларды ілгерілетуге, волонтерлерді тартуға, волонтерлік топтар арасындағы ынтымақтастықты жолға қоюға көмектеседі. Қазіргі уақытта бот бойынша 450 ерікті мен 68 ұйым тіркелді”, – дейді Аида Сайын.

Сонымен қатар ол волонтерлік ұйымдар мен еріктілер тобының көбеюіне орай инфрақұрылымдық жағынан көмек көрсетілгенін айтады. Ол үшін жалпы үйлестіру және ресурстық көмек жүзеге асырылатын еріктілердің өңірлік фронт-офисі жұмыс істейді.

“2022 жылы еріктілердің қатысуымен 725 шара өткізілді. Нәтижесінде 41 281 адамға көмек көрсетілді. Еріктілердің жеке бастамаларын бизнес қоғамдастық қолдайды. Мәселен, "Игі істер марафоны" жалпыұлттық жобасы аясында "Qaiyrymdy ūrpaq" облыстық қайырымдылық акциясы өткізілді, оның барысында 2021-2022 жылдары 258 балаға көмек көрсетілді, ерікті жарналар көлемі шамамен 10 миллион теңге болды”, – дейді Аида Сайын.

Жастар ресурстық орталығының директоры бұнымен қоса өңірде эковолонтерлік белсенділік дамып келе жатқанын жеткізді.

Бүгінде "Jasyl aimaq" экологиялық акциясы аясында 2021-2022 жылдары 3000-ға жуық еріктілердің қатысуымен 71 іс-шара өткізілген.

“Сондай-ақ бізде зияткерлік волонтерлік бойынша мүмкіндігі шектеулі балаларды ағылшын тіліне онлайн-оқытуға бағытталған "All inclusive Kids" жобасы іске асырылды. Жобаға 17 ерікті мен 74 бала қатысты. Волонтерлік қоғамдастықтарды одан әрі қалыптастыру және олардың арасындағы ынтымақтастықты жолға қою үшін Қарқаралы ауданында "VolUnity – 2022" екі күндік көшпелі форум, сондай-ақ ең белсенді волонтерлер мен ұйымдар марапатталған волонтерлердің қорытынды форумы ұйымдастырылды”, – дейді Аида Сайын.

Бұдан бөлек Қарағанды облысының жастар ресурстық орталығы "Волонтерлер фронт-офисінің қызметін ұйымдастыру жөніндегі іс-шаралар кешені" әлеуметтік жобасы шеңберінде облыстың волонтерлік ұйымдары арасында былтырдан бері гранттар конкурсын өткізген. Жалпы гранттық қор 2 500 000 теңгеге тең.

“Бұл қолдау жыл сайынғы негізде жоспарланып отыр және оны қаржыландыру көлемі "Ұлттық рухани жаңғыру" ұлттық жобасының көрсеткіштеріне сәйкес жыл сайын 1,5 есеге ұлғаятын болады. 2023 жылы гранттар конкурсына 3,5 млн. теңге бөлінді. Жалпы облыс бойынша волонтерлік қызметті қаржыландыруға 2022 жылы 32,5 млн. теңге бөлінді. Осы жылы қаржыландырудың жоспарланған көлемі 36,7 миллион теңгеге тең”, – дейді жастар ресурстық орталығының директоры.

Талқылау