Қарағанды облысында оқушыларды интернаттан шығарып, орнына шенеуніктерді орналастырған
Қарағанды облысында мектеп-интернат оқушыларын жатақханадан шығарып жіберген екен. Көпшіліктің наразылығынан кейін облыстық прокуратура тексеріс жүргізді. Бұл туралы Stan.kz ақпарат агенттігі хабарлайды.
Фото: Pixabay.com
Қарағанды облысы Шет ауданы Ы.Алтынсарин атындағы мектеп-интернатына кешенді тексеріс жүргізілді.
"Ресурстық орталықтың құрылыс кешеніне жақын маңдағы ауылдардан келіп оқитын 100 балаға арналған 3 қабатты жатақхана кіреді. 2022 жылдың соңында комиссияның санитарлық-эпидемиологиялық қорытындысы жоқ шешімімен балалар жатақханадан шығарылып, ресурстық орталық ғимаратының 2-қабатына орналастырылды, ал 2-қабат балалардың тұруына арналмаған", – деп түсіндірді облыстық прокуратура.
Оқу кабинеттерінің қысқаруы, жеке кабинеттердің қосалқы бөлмелерге айналуы аумақтардың белгіленген нормаларының бұзылуына әкеп соқты.
Тексеріс барысында жатақхананың 2-қабатында "Шет ауданының білім бөлімі" мемлекеттік мекемесі жұмыс істеген, ал 3-қабатында білім бөлімінің басшысы, қызметкерлер мен әдіскерлер орналасқаны анықталды.
Прокурорлық қадағалау актісі бойынша балалар жатақхана ғимаратына қайтарылды. Ресурстық орталықтың жатын бөлмелері оқу кабинеттеріне айналды.
Кінәлілер заңмен белгіленген жауапкершілікке тартылды.