Қарағанды облысында кеншілерден ақша бопсалады деген айыппен қылмыстық топтың 25 мүшесі ұсталды
Қарағанды облысында кеншілерден ақша бопсалаған қылмыстық топтың тағы 25 мүшесі ұсталды. Бұл туралы Stan.kz ақпарат агенттігі 31-арнаның “Информбюро” бағдарламасына сілтеме жасап хабарлайды.
Видеодан скриншот
Желтоқсан және ақпан айларының басында кеншілерден ақша бопсалады деген айыппен 7 адам ұсталған еді. Содан кейін сол ұйымдасқан қылмыстық топтың 8 мүшесі ұсталды.
Қаскөйлер "Қармет" АҚ қызметкерлері мен Абай қаласының тұрғындарынан жалпы сомасы 55 миллион теңгені тонап кеткен. Жеке кәсіпкерлер мен ЖОО студенттері де жәбірленуші ретінде танылды. Ұйымдасқан қылмыстық топ мүшелері қоғамдық тәртіпті бұзып, ұрып-соғып, бопсалап, ақша алған. Олардың 15 фактіге қатысы бары анықталды. Сондай-ақ күдіктілер "Қазақстан темір жолы" вокзалында қарулы қылмыстық төбелес ұйымдастырып, жүктерді ұрлаған.
“Жалпы топтың 25 мүшесі ұсталды. Оның ішінде белсенді 10 адам қамауға алынды. Тінту кезінде атыс қарулары мен оқ-дәрілер, діни әдебиеттер мен ірі көлемде қаржы тәркіленді. Қазіргі уақытта олардың басқа да қылмыстарға қатысы бар-жоғы анықталып жатыр. Басқа мәліметтер тергеу мүддесі үшін жарияланбайды”, – деді ішкі істер министрлігінің ресми өкілі Шыңғыс Әлекешев.
Еске салсақ, бұған дейін Qarmet кеншілерін бопсалап, ҚТЖ-ны тонаған қылмыстық топтың 8 мүшесі ұсталған еді.