Каналдың бетін жабу туралы бірнеше рет айтылған: Алматы облысында 5 жасар бала суға батып кетті 

Алматы облысы Іле ауданы Жәпек батыр ауылында 2018 жылы туған бала суға батып кетті. Бұл туралы Stan.kz ақпарат агенттігі хабарлайды. 

Қайғылы жағдай кеше, 3 тамызда 19:00 шамасында орын алған. 

5 жасар бала досымен ойнап жүріп, абайсызда аяғы тайып кетіп, тереңдігі 3 метрлік Қосөзен каналына құлап кеткен. Оқиға орнына келген құтқарушылар оның денесін тек бір жарым сағаттан кейін, оқиға орнынан үш шақырым жерден тапқан. 

"Іздестіруге 4 құтқарушы мен 2 арнайы техника, оның ішінде Алматы облысы ТЖД Жедел-құтқару жасағының жүзу құралы және РОСО-ның 4 қызметкері мен 1 техникасы жұмылдырылды" - деп хабарлайды Алматы облысы Төтенше жағдайлар департаменті.  

Жергілікті тұрғындар каналдың бетін жабу керектігі туралы әкімдікке бірнеше мәрте барып айтқанын жеткізді. Алайда жергілікті билік өкілдері ешқандай шара қолданбаған.