Ер адам әйелімнен ажырасқан соң қызының бар жағдайын жасағанын айтады. Баспана беріп, 50-100 мыңдап қаржылай көмектесіп тұрған екен. Ол аздай 500 мың теңге көлемінде ақшаны несиеге де рәсімдеп бергенін қосып өтті. Ал анасының қызын шұғыл ұзатуының арғы жағында дәл осы ақшаға құнығушылық жатыр деп ашуланды.

“Менің қызымды банк ретінде пайдаланған. Неге шұғыл күйеуге беріп жібергенін түсінбей қалдым. Мен жаман болайын, жақсы болайын, әкесімін ғой?! Маған хабарлап айту керек еді ғой. Мен қызымды сеніп бердім. Өгей шеше де сатпайды өзінің қызын”, – деді 15 жастағы қыздың әкесі Бауыржан Мәсімов.

Қыздың анасы бұрынғы жолдасының айтқандарымен келіспейді. Онсыз да алимент төлеп жарытпаған соң, ақша сұрауды да тоқтатқанын айтады. Керісінше, құнды заттарын ұрлап, істі болған азаматқа сотта кешірім де берген екен. Келіншектің айтуынша, кезінде әкесі қызын өзіне айтпастан интернатқа өткізіп жіберген. Әрі қызы ерікті түрде тұрмыс құрамын деген соң сүйген жігітіне қосылуына қарсы болмаған. Ажырасқалы бері қызына көңіл бөлмеген әкенің кенет "жанашыр" бола қалғаны өтірік, "қызын сатты" дегені жала деп мәлімдеді.

“Мен қызымды сататын болсам, неге 2 миллион сұрамаймын? Неге 600-ақ мың теңге? Құдалар барын берді. Біздің бар жағдайымыз осы, екеуі бір-бірін жақсы көреді деді. Мен15 жасар қыздың тұрмысқа шықпайтынын білмеппін. Сол менің қателігім болып тұр. Бір жағынан екеуі тіл табыса алмады. Жас қой оның үстіне. 7-желтоқсанда беташары болды. 31 желтоқсанда барып алып келдім”, – деді қыздың анасы Кәмила Керімбекова.

Дегенмен қазір полиция қылмыстық кодекстің 122-бабы, яғни 16 жасқа толмаған адаммен жыныстық қатынасқа түсу дерегімен қылмыстық іс тіркеп, тергеу жүргізіп жатыр. Ал қыздың әкесі көрсеткен өзге деректер анықталмаған.

“Полицейлер іс-шаралар кешенін жүргізді. Алайда қызды ұрлау мен мәжбүрлеп ұстау фактілері расталмады. Оқиғаның қатысушылары қыз бен жігіт бір-бірін ұзақ уақыттан бері танитыны және бірге өмір сүруді жоспарлағаны анықталды”, – Түркістан облыстық полиция департаментінің баспасөз хатшысы Гүлнәр Әбдірахманқызы.

Істі Жетісай полиция бөлімі тергеп жатқанымен, департамент басшылығы оны бақылауға алған. Ажырасқан қыз қазір анасымен бірге Шымкент қаласында пәтер жалдап тұрады. Он жылдай хабарсыз кеткен әкесінің көмегіне қызы да, бұрынғы әйелі де мұқтаж емеспіз деп отыр.

Айта кетейік, бұған дейін Түркістан облысында ер адам 15 жастағы қызды алып қашқаны туралы хабарлаған едік. Ер адам мектеп оқушысын ұрлап, анасына қалың мал ретінде 600 мың теңге төлеген. Кейін бұл туралы қыздың әкесі біліп, полицияға арызданған.

Талқылау