Израиль Газадағы шабуылды күшейтіп жатыр: Нетаньяху жаңа әскери операция бұдан да ауқымды болатынын мәлімдеді

Фото: cnbc.com

Израиль премьер-министрі Биньямин Нетаньяху 10 тамыз күні Иерусалимде өткен баспасөз мәслихатында Газа секторындағы жаңа әскери операция туралы айтты. Ол бұл операция бастапқыда жарияланғаннан да ауқымды болатынын мәлімдеді. Бұл туралы Stan.kz ақпарат агенттігі Сnbc.com сайтына сілтеме жасап хабарлайды.

Нетаньяхудың айтуынша, Израильдің "басқа амалы жоқ" және ХАМАС-ты толық жою қажет. Соңғы апталарда ел ішінде де, шетелде де сын күшейгеніне қарамастан, ол Қауіпсіздік кабинеті өткен аптада тек Газа қаласындағы емес, "орталық лагерлер" мен Муваси аймағындағы ХАМАС бекіністерін де жою туралы шешім қабылдағанын мәлімдеді.

БҰҰ дерегі бойынша бұл лагерьлерде жарты миллионнан астам босқын тұрады. Израиль жұма күнгі мәлімдемесінде бұл аудандарды атамаған еді. Нетаньяху қарсыластарының бір бөлігі тек Газа қаласын нысанаға алу жеткіліксіз деп сынаған. Ол "қауіпсіз аймақтар" болатынын айтты, бірақ өткенде мұндай аймақтардың да бомбаланғаны белгілі.

Жексенбі кешінде Нетаньяху кеңсесі оның АҚШ президенті Дональд Трамппен сөйлесіп, бұл жоспарды талқылағанын және Трамптың "берік қолдауына" алғыс айтқанын хабарлады. Израиль премьер-министрі Биньямин Нетаньяху БҰҰ Қауіпсіздік кеңесінің төтенше отырысы алдында шетелдік БАҚ-қа мәлімдеме жасады. Ол Газадағы аштық жайлы айтылған пікірлерді және "әлемдік жалған ақпарат науқанын" жоққа шығарды.

"Біздің мақсатымыз – Газаны басып алу емес, Газаны азат ету", – деді Нетаньяху.

Ол алдағы қадамдар үшін "өте қысқа уақыт кестесі" барын айтты, бірақ егжей-тегжейлі түсіндірмеді. Мақсаттар қатарында аймақты қарусыздандыру, Израиль әскерінің қауіпсіздік бойынша толық бақылауы және израильдік емес азаматтық әкімшіліктің құрылуы бар.

Нетаньяху Газаға гуманитарлық көмек тарату пункттерін көбейтуді қалайтынын айтты. Дегенмен жергілікті БАҚ-қа берген сұхбатында "Аштық жоқ. Аштық болған да емес. Тек тапшылық болды, бірақ ешқандай аштық саясаты болған жоқ", – деді.

Сондай-ақ ол әскерге Газаға "шетелдік журналистерді көбірек тартуды" тапсырғанын мәлімдеді. Бұл соғыс кезінде журналистердің тек әскери нысандарда ғана болуына рұқсат берілгендіктен тосын жағдай болар еді. Нетаньяху Газа халқының қиын жағдайына ХАМАС-ты кінәлады – бейбіт тұрғындардың қаза табуы, қираулар және көмектің жетіспеуі үшін. Оның сөзінше, ХАМАС әлі де мыңдаған қарулы жауынгерге ие, ал палестиналықтар олардан құтқаруды "жалбарына" сұрап отыр.

ХАМАС бұған жауап ретінде Нетаньяху сөздерін "өрескел жалғандық" деп атады. АҚШ Қауіпсіздік кеңесінде Израильді қорғап, оның қауіпсіздігі үшін ең дұрыс шешімді өзі қабылдауға құқығы бар екенін айтты. Сондай-ақ Газада геноцид болып жатыр деген айыптауларды жалған деп атады. АҚШ Қауіпсіздік кеңесінде вето құқығына ие, сондықтан ұсынылған шараларды бұғаттай алады. Қытай Газадағы адамдарға "ұжымдық жаза" беруді қабылдауға болмайтынын айтты. Ресей "соғысты ойланбай күшейту" қаупі жөнінде ескертті.

БҰҰ-ның гуманитарлық мәселелер жөніндегі басқармасынан Рамеш Раджасингхам "Бұл енді ашаршылық қаупі емес, бұл ашаршылықтың өзі" деп мәлімдеді. Оның айтуынша, Газа секторындағы гуманитарлық жағдай "өте қорқынышты" деңгейге жеткен, тіпті оны сипаттауға сөз табу қиын.

Израиль халықаралық қысымға, тіпті одақтастарының наразылығына да тап болды. Премьер-министр Биньямин Нетаньяху Германия канцлері Фридрих Мерцті әскери техника экспортына шектеу қойғаны үшін сынға алды. Мерц болса, Берлин мен Тель-Авив арасындағы қарым-қатынас достық негізінде қалатынын, бірақ келіссөздер "өте сындарлы" жүріп жатқанын айтты.

Кем дегенде 31 палестиналық гуманитарлық көмек алу кезінде қаза тапқан. Куәгерлер мен ауруханалар Израиль әскерін айыптады. Мораг дәлізінде (Рафах пен Хан-Юнисты бөліп тұрған) көмек күтіп тұрған 15 адам көз жұмды.

Газаның солтүстігіндегі Зиким өткізу бекеті маңында 6 адам қаза тапты. Газаның орталығында гуманитарлық орталыққа баруға тырысқан адамдарға ескерту оқтарынан кейін оқ атылғаны айтылды, 4 адам қаза тапты. Хан-Юнис пен Рафахта GHF мекемесіне жетпек болған тағы 6 адам өлтірілген.

GHF (АҚШ қаржыландыратын және Израиль басқаратын Гуманитарлық қор) өкілдері сол күні өз нысандарында ешқандай оқиға болмағанын айтты. Израиль әскері де орталықтар маңында атыс болмағанын мәлімдеді. Соғыс басталғаннан бері аштықтан қаза тапқан балалар саны 100-ге жетті. Маусым айынан бері 117 ересек адам аштық немесе тамақ жетіспеушілігі салдарынан көз жұмды. ХАМАС басқаратын денсаулық сақтау министрлігінің дерегі бойынша, соғыста жалпы 61 400 палестиналық қаза тапқан, олардың шамамен жартысы әйелдер мен балалар. Тұтқындардың туыстары алдағы аптада ереуіл өткізуге шақырды, өйткені әскери операцияны кеңейту олардың өміріне қауіп төндіреді деп санайды. Қазір 50 тұтқын бар, олардың 20-сы тірі деп есептеледі.

Ондаған адам Иерусалимдегі АҚШ консулдығы алдында акция өткізіп, бұл шешімге қарсы шықты. Митингке қатысушы Милли Ротшильд "Бұл  олардың тірі қалуын қаламаймыз дегенмен бірдей" деп айтқан.

Израильдің Газаға шабуылы кезінде Al Jazeera-ның түсірілім тобының мүшелері қаза тапты

Газа секторынан алты Қазақстан азаматы эвакуацияланды

Еске салайық, бұған дейін Газада аштықтан қаза тапқандар саны 175 адамға жеткенін жаздық. Газа денсаулық сақтау министрлігінің бас директоры Мунир әл-Бурштың мәліметінше, аштықтан көз жұмғандардың 93-і балалар. Израильдің соққылары мен қатаң қоршауында қалған Газа секторы гуманитарлық апат жағдайында: азық-түлік, су, дәрі-дәрмек, медициналық және гигиеналық құралдар қатты жетіспейді. Әсіресе аштықтан қайтыс болған балалар саны күн санап артып жатыр. Жергілікті және халықаралық дереккөздер Израильдің аштық пен шөлді "қару" ретінде қолданып отырғанын атап өтеді.