Соңғы жаңалықтар
Соңғы жаңалықтар

Ғылым министрлігі ҚазҰУ-дағы студенттердің өлімінен кейін тексеру жүргізетін болды

ҚазҰУ ғимараты
Фото: farabi.university

Ғылым және жоғары білім министрлігі әл-Фараби атындағы ҚазҰУ-да студенттердің қауіпсіздігіне қатысты кешенді тексеру жүргізетін болды. Бұл туралы Stаn.kz ақпарат агенттігі хабарлайды. 

Министрліктің мәліметінше, арнайы топ университеттегі жанжалдардың алдын алу, студенттердің өмірі мен денсаулығын қорғау жұмыстарына баға береді.

“ҚазҰУ-ға мониторингтік топ жіберіледі. Топ студенттердің қауіпсіздігін қамтамасыз ету, өмірі мен денсаулығын қорғау бөлігінде заңнама мен ішкі құжаттар талаптарының сақталуын зерделейді. Сондай-ақ тәрбие, әлеуметтік-психологиялық және профилактикалық жұмыстардың тиімділігін бағалайды. Жанжалды жағдайларды анықтау мен алдын алудың, студенттердің өтініштеріне уақтылы ден қоюдың және оларға психологиялық көмек көрсетудің қолданыстағы тетіктеріне ерекше назар аударылады”, – делінген хабарламада. 

Министрлік тексеру қорытындысы бойынша студенттік ортада қауіпсіздікті арттыру және профилактика жүйесін жетілдіру жөнінде қосымша шаралар әзірленетінін мәлімдеді.

Еске сала кетейік, өткен аптадағы жұмадан сенбіге қараған түні ҚазҰУ-дағы Журналистика факультетінің студенттері тұратын №5 жатақханада белгісіз себептермен 1-курс студенті қайтыс болды. Студенттердің сөзінше, марқұм жатақханада өз-өзіне қол жұмсаған. Одан соң 16 қарашада ҚазҰУ-дағы екінші студенттің қазасы туралы ақпарат тарады. Осы жағдайлардан соң проректор мен факультет деканы қызметінен босатылды.

Гүлсезім Мұхатай
Сейсенбі, 17 Қараша, 2026 16:07