Германиядағы ферма рекордтық өнімнен кейін миллиондаған картопты тегін таратты
Германияның Саксония жеріндегі бір ферма ел бойынша рекордтық өнім жиналғаннан кейін картоптың мол қорын тегін таратып жатыр. Бұл туралы Stan.kz ақпарат агенттігі Bbc.com-ға сілтеме жасап хабарлайды.
Қаңтардың ортасынан бері мыңдаған дәмді түйнек ел астанасы Берлинге жеткізіліп жатыр. Тұрғындар тайғақ көшелерде тайып құлап қалу қаупіне қарамастан, өз үлесін алуға асығады.
“Картопты ұлы құтқару” деп аталған бұл акция шамамен 4 миллион келі артық картоптың бұзылып, рәсуа болуына жол бермеу үшін басталды. Ұйымдастырушылардың айтуынша, көмек алушылардың қатарында азық-түлік банктері, мектептер мен шіркеулер бар.
Алайда Бранденбург фермерлер қауымдастығы бұл бастаманы “жиіркенішті пиар-айла” деп атап, оның жергілікті нарыққа әсеріне алаңдаушылық білдірді.
Германия – Еуропалық одақтағы картоп өсіретін елдердің арасында көшбасшы, ал былтырғы өнімнің молдығы нарықты қанықтырып жіберді.
Жобаны әзірлеуге жетекшілік еткендердің бірі, Berliner Morgenpost газетінің редакторы Петер Шинкенің сөзінше, негізгі мақсат – картопты құнды азық-түлік ретінде алдыңғы қатарға шығару.
Газет экологиялық таза іздеу жүйелерін әзірлейтін Ecosia компаниясымен бірлесіп, картопты тарату үдерісін үйлестіріп, қаржыландыруға атсалысқан.
Өздерінің “керемет түйнектерін” қайтадан егістікке төгіп тастағысы келмейтін Osterland Agrar компаниясы шамамен 500 000 келі картопты автобустармен Берлинге, сондай-ақ Германияның өзге өңірлеріне және Украинаға жөнелтуді жоспарлап отырғанын мәлімдеді.
“Біз оларды осы жылдың ортасына дейін сақтай аламыз”, – деді Osterland Agrar компаниясының басқарушы директоры Ханс-Йоахим фон Массов. Оның айтуынша, клиенттік келісімшарт тоқтатылып, есеп айырысу аяқталғаннан кейін барлық картоп осы кәсіпорынға өткен.
Алайда бұған қуана бермейтіндер де бар.
“Азық-түлік әрдайым құнды болып қала береді, тіпті немқұрайлы “қайырымдылар” мектептер мен шіркеулерге тегін картоп таратса да”, – деді Бранденбург фермерлер қауымдастығының өкілі Тимо Шайб.
Берлинде арнайы сайтта астана мен оған іргелес аумақтағы 174 “картоп беру нүктесі” көрсетілген.
BBC түсіру тобы жабық қалалық әуежай – Темпельхофер-Фельд аумағындағы тарату орнына картоп аламыз деген үмітпен барды, бірақ ол жерден көкөніс салынған қаптар көрінбеген. Кейіннен ынғайсыздыққа қарамастан, жергілікті тұрғын әйелден бұл маңда “тегін картоп түйнектерін” көрдіңіз бе деп сұрағанда, ол таңырқағандай, тіпті алаңдағандай болып көрінген.
Соған қарамастан, Саксонияда картоп өсіру қарқыны артқан сайын, бұл оқиға Германияда да, шетелде де кеңінен жарияланды.
Түптеп келгенде, бұл – картопқа деген гастрономиялық ықыласымен танылған ел.
Дегенмен Шинке қазір Берлинге ағылып жатқан адамдар легі біртіндеп тоқтауға тиіс екенін айтты, себебі қаржыландыру азайып барады.
Ауа райы жеткілікті жылынған соң, тағы бір жүк партиясы жеткізіледі деп күтіледі.
Айта кетейік, бұған дейін Маңғыстауда йогурт тиелген жүк көлігі аударылып қалып, жүргізуші тауарды тегін таратқаны хабарланған еді.
