"Фосфор сүйегіне дейін жеуі мүмкін": Нұрлан Нығматуллиннің ұлдарының басқаруындағы зауытта екі жұмысшы химиялық күйік алды

Жаңа Жамбыл фосфор зауытында екі жұмысшы химиялық күйік алды. Зауыт Нұрлан Нығматуллиннің ұлдарының басқаруындағы "Қазфосфат" ЖШС құрамына енеді. Бұл туралы Stan.kz ақпарат агенттігі хабарлайды. 

Оқиға туралы журналист Михаил Козачков Telegram-арнасында мәлімдеді. 

"3 тамызда Тараздағы "Жаңа Жамбыл фосфор зауыты" ЖШС аумағында төтенше жағдай орын алды. Екі адам химиялық күйік алды", – деп жазды ол. 

KazTag басылымының мәліметінше қазіргі таңда жұмысшылар ауруханаға жатқызылды. Екеуі де жансақтау бөлімінде.

"Сары фосфорға күйіп қалған. Біреуі күйік бөлімінде, екіншісінің жағдайы ауыр. Денесінің 20%-ын күйік шалған. Бірақ фосфорға күйіп қалған, ал фосфор сүйекке дейін жеп қоюы мүмкін", – делінген хабарламада.