Ер адам жыртқыш аюға қарсы жалаңаш қолмен төбелескен

Канадада 61 жастағы ер адам аюмен алысқан. Жыртқышпен төбелескен ол бар болғаны денесінің кей тұстарын ғана жырып алыпты.

Сурет tolkovaniyasnov.ru

Бұл туралы nz1.ru хабарлайды.

Бұрынғы аңшы Рик Нельсон өзінің итін серуендетіп жүріп, кездейсоқ қонжыққа кез болады. Қорқып кеткен аюдың баласы ырылдап сес көрсете бастайды. Оның дауысын естіген 140 келі тартатын қара аю жетіп келген. Сол кезде барып Рик бұл қиындықтан қашып құтыла алмайтынын сезген.

Ер адам өзіне жақын маңнан не тас, не таяқ таба алмайды. Сол себепті ақырған жыртқышқа қарсы жалаңаш қолмен ұрыс салған.

“Менің жалғыз мүмкіндігім ол алып аюды тұмсығынан ұрып құлату болды. Сондықтан мен оның табанын қашан сілтейтінін күттім де, сосын оған жауап қайтардым”, – деді Нельсон.

Аюдың соққысынан соң ер адамның беті мен кеудесіне аздаған жарақат түседі. Бірақ, Рик аса қауіпті жараланбаған. Егер кішкентай қонжық анасын орманға қарай сүйрелемегенде төбелес ұзаққа созылуы да мүмкін еді. Риктің кішкентай кезінен қоян-қолтық ұрыс мектебіне қатысқаны да осылайша өз септігін тигізді.