Енді елімізде Ұлттық қордан бөлінген қаржының қайда жұмсалғаны тексеріледі
Қазақстанда ұлттық қордан бөлінген қаражаттың жұмсалуына мониторинг жүргізу жөніндегі комиссия жұмысын қайта бастады. Бұл туралы Stan.kz ақпарат агенттігі хабарлайды.
Мемлекет басшысының тапсырмаларын орындау мақсатында комиссияның қызметі жаңартылған форматта, жаңа құраммен жалғасады. 21 ақпанда Әлихан Смайыловтың төрағалығымен жоғары аудиторлық палатада комиссияның отырысы өтті.
Отырыс барысында комиссия төрағасы Әлихан Смайылов ұлттық қор қаражатын жұмсау заңдылығы мен тиімділігіне мониторинг жүргізу тәсілдері өзгеретінін атап өтті.
"Комиссияның жұмысын қайта бастауымыз керек. Ведомствоаралық іс-қимыл мен ұлттық қор қаражатының тиімді және мақсатты пайдаланылуын бақылау үшін жауапкершілік аймақтарын нақты айқындау қажет", — деді Смайылов.
"Ұлттық қор – балаларға" бағдарламасына байланысты да ұлттық қорды ұтымды пайдалану мәселесі қарастырылады.
"Ұлттық қордан алынатын трансферттерден экономикалық қайтарым болуы қажет. Ұлттық қор мемлекеттік маңызды емес міндеттерге пайдаланылмауы тиіс. Мемлекет басшысы осындай міндет қойды", — деді жоғары аудиторлық палата төрағасы.
Премьер-министр алдағы кезеңге арналған міндеттерді атап өтті:
- Ұлттық қордан экономиканы жеңілдетілген шарттармен қолдауға бөлінген қаражатқа тексеру жүргізу;
- Ұлттық қор қаражатын неғұрлым басым бағыттарға қайта бөлу немесе оларды қайтару жөнінде ұсыныстар беру.
Отырыс барысында комиссия құрамын жаңарту, оның қызметін жаңа форматта регламенттеу, қорытындылардың сапасын арттыру және т. б. мәселелер талқыланды.
Еске салсақ, үкімет ұлттық қордан қазіргі деңгейде үлкен көлемде қаражат алуды жалғастыра берсе, 2035 жылға қарай қордағы ақша таусылуы мүмкін екені айтылды.