"Егін жинауға кедергі": Вице-министр елімізде алдағы күндері жауын-шашын күшейіп, күн суитынын айтты

Фото: pixabay.com

Экология вице-министрі Нұркен Шәрбиев алдағы күндері елімізде ауа райы жауын-шашынды болып, күн суытатынын жеткізді. Айтуынша, бұл егін жинауға кедергі келтіреді. Бұл туралы Stan.kz ақпарат агенттігі хабарлайды. 

Вице-министрдің айтуынша, синоптиктердің болжамы бойынша қыркүйек айының 23-інен 30-ына дейінгі аралықта еліміздің астық егетін аймақтарында ауа райы егін жинауға жайсыз болады.

Болжам бойынша:

•  – Қостанай, Ақмола, Солтүстік Қазақстан облыстарының басым бөлігінде осы кезең бойы жаңбыр жауады.
•  – Ақтөбе облысында 26-30 қыркүйек аралығы,
•  – Батыс Қазақстан облысында 25-29 қыркүйек аралығы,
•  – Қарағанды, Ұлытау облыстарында 27-30 қыркүйек аралығы жауын-шашынды болады.
•  – Павлодар облысында қыркүйектің 23-25-і және 28-30-ы аралығында жаңбыр.
•  – Еліміздің шығысында қыркүйектің 23-24-і, 29-30-ы жаңбыр.

Жауын-шашын күндері қатты жел болады. 23-30 қыркүйек аралығында күндіз де, түнде де ауа температура біртіндеп төмендеп, түнгі уақытта қырау түсуі мүмкін.

• "Тағы бір жаңа зең түрі": Алматылықтар соңғы күні аллергияның өршігеніне шағымданды 

• Сауда министрлігі ет бағасын өсірген кәсіпкерлерге айыппұл салды

Қазан айында еліміздің басым бөлігінде орташа айлық ауа температурасы қалыпты деңгейде болады. Ал батыста, оңтүстік-батыста және оңтүстік бөлікте әдеттегіден жылы болады.

"Еліміздің батыс, солтүстік, шығыс және оңтүстік-шығыстағы таулы өңірлерінде бір ай бойы жиі жауын-шашын түсуі ықтимал. Айтылған болжамдарды ескере отырып, астық жинауға қолайлы кезеңдерді тиімді пайдалану қажет деп есептейміз", – деді Нұркен Шәрбиев.