Депутаттың әйеліне тиесілі компания Орталық Азиядағы ең ұзын көпір салудан миллиардтаған табыс тапқан

Фото: primeminister.kz

Бұқтырма су қоймасы арқылы өтетін көпір құрылысына жауапты "ОблШығысЖол" компаниясы 2023 жылы 220 миллион теңге, ал 2024 жылы 2,7 миллиард теңге пайда тапты. Компания кірісі бір жылда 12,1 есе өскен. Бұл туралы Stan.kz ақпарат агенттігі хабарлайды.

"ОблШығысЖол" Шығыс Қазақстан облысында тіркелген. Оның жалғыз иесі "Элхон" ЖШС болып тіркелген.  Ал ол Жанболат Қазанов пен мәжіліс депутаты Лұқбек Тұмашиновтың әйелі Сәуле Тұмашиноваға тиесілі. "ОблШығысЖол" басшысы Қазанов көлік саласын дамытуға қосқан елеулі үлесі үшін тамызда Қасым-Жомарт Тоқаевтың қолынан 2-дәрежелі "Барыс" орденін алды.

Компанияның қаржылық есебіне сәйкес, тапсырыс берушілермен жасалған келісімшарттар бойынша кіріс 2023 жылғы 20 млрд теңгеден 32,2 млрд теңгеге дейін өсті. Бұл кіріске жазғы және қысқы жолдарды күтіп ұстау (4,3 млрд теңге), жол жөндеу қызметі (978 млн теңге, 148,1 млн теңге), сондай-ақ тауарды сатудан түскен кіріс (1 млн теңге, 1 млн 28 млн теңге) кірді.  Дегенмен ең көп кіріс көпір құрылысынан түскен, яғни 26,2 млрд теңге.

2019 жылдың 19 қыркүйегінде президент Тоқаев үкімет пен Шығыс Қазақстан облысының әкімдігіне Бұқтырма су қоймасы арқылы өтетін көпір құрылысына қаржы бөлу мәселесін қарастыруды тапсырды. Ол кезде Шығыс Қазақстан облысының жеті ауданының (Күршім, Тарбағатай, Зайсан, Марқакөл, Алтай, Үлкен Нарын, Катонқарағай) тұрғындары мен қонақтары 50 жылдан астам жұмыс істеп тұрған паромды жаз бойы пайдаланатын.

Суық мезгілде автокөлік жүргізушілері мұзда жүруге немесе шамамен 600-700 км (көлік түріне байланысты) айналма жолмен жүруге мәжбүр болды. Облыс әкімдігінің мәліметінше, жүздеген көлік мұзға құлап, 300-ге жуық адам қаза тапқан.

2020 жылдың ақпанның басында Шығыс Қазақстан облысының жолаушылар көлігі және автомобиль жолдары басқармасының басшысы Нұржан Жұмаділов журналистерге көпір құрылысы басталғанын хабарлады. Ол кезде көпір құрылысының құны 30,2 миллиард теңгеге бағаланса, оның 90%-ы республикалық, 10%-ы облыстық бюджеттен бөлінеді деп күтілген. Облыстық бюджеттен бөлінген алғашқы 500 миллион теңге алаңды дайындау, техниканы жұмылдыру және басқа да шараларды бастауға жұмсалды. Кейін жоба құны екі есе өсіп, 61 миллиард теңгеге жетті.

2024 жылдың қазан айында "ОблШығысЖол" Ұзындығы 1316 метр, ені 13 метр, Бұқтырма су қоймасы арқылы өтетін екі жолақты көпірді пайдалануға берді.

Ертіс өзеніндегі Бұқтырма су электр станциясының бөгетінен пайда болған Бұқтырма су қоймасы – Қазақстандағы ең ірі су қоймасы. Ол жер беті бойынша әлемдегі ең ірі жасанды су қоймаларының ондығына кіреді. Су қоймасын толтыру 1960 жылы басталды.