Халықаралық қазақ-орыс университеті ақпан айында ішкі тексеріс жасап, 350 студентті оқудан шығарғанын хабарлады. Олардың 91-і оқу ақшасын төлемеген, 259 студенттің сабаққа қатыспайтыны анықталған. Оқу жылы аяқталар шақта төбеден жай түскендей болған ата-аналар мен студенттер министрліктен көмек сұраған еді.

2 сәуірде оқу орнына Ғылым және жоғары білім министрлігінің Жоғары және жоғары оқу орнынан кейінгі білім комитетінің төраға орынбасары Ақерке Абылайхан келді. Ол көпшілікке мән-жайды түсіндірді.

“Бүгін ұшып келдік. Бұл жеке меншік университет. Бірақ университет мамандар даярлап отырғандықтан министрлік бұл мәселеге бірден араласты. Бұйрық 18 наурызда шығарылған. Бізде министрдің 595-бұйрығы бар. Онда ЖОО-ның қызметін үйлестіру қағидасы бар. Егер студент оқу орнынан шығарылған жағдайда жоғары білім платформасындағы жүйеге оның статусы үш күн мерзімде енгізілу керек. Бүгінгі таңда барлық студенттердің мәртебесі аталған ақпараттық жүйеде сақталған”, – дейді ол.

Сондай-ақ ол студенттер шығарылған бұйрық тек орыс тілінде екенін айтты. Оның үстіне университет құжаттарында құқықтық сұрақтар көп дейді.

“Бізде мемлекеттік не мемлекеттік емес ұйымдарда міндетті түрде ақпарат қазақ тілінде жүру керек. Университтеттің құжаттарында құқықтық сұрақтар өте көп. Себебі кейбір келісімшарттарда 40 сағаттық сабаққа келмеу болса, университеттің бекітілген ішкі ережесінде 60 сағат деп жазылған. Сондықтан министрлік тарапынан студенттердің құқықтық мәртебесі сақталғанын айтқым келеді. Бәрінің студенттік мәртебесі тұр. Оны өздері көре алады”, – дейді ол.

Сонымен қатар министрлік өкілі құқықтық негізде құжаттардан қарама қайшылықтар байқағанын жеткізді.

“Министрлік тарапынан арнайы тексеру жүргізіледі. Бақылау комитеті бар. Сондықтан студенттердің статусы сақталады. Қаражаты болмай оқудан шығарылған азаматтар бар. Оқу ақшасы төленсе студент мәртебесі қайтарылады. Студенттерді ауыстыру мәселесі оқу семестрі аяқталатын жаз және қысқы демалыс кезінде жүреді. Бұл жерде әр адамның тағдыры тұр. Студенттердің неге сабаққа келмегенін әрі қарай зерделейміз. Студенттер сабаққа қатысу керек. Ол оқу процесіндегі негізгі міндет. Құжаттарда қарама-қайшылық бар. Сондықтан бұйрықтың заңға сәйкес шығарылмаған”, – деді Ақерке Абылайхан.

Қазіргі уақытта студенттер оқудан қалу себебін түсіндіріп, анықтамалар тапсырған.

Айта кетейік, оқу орнында 2000-нан аса студент оқиды.

Еске салайық, бұған дейін Ақтөбедегі жекеменшік университет бір күнде 350 студентті оқудан шығарып жібергені туралы жазған едік.

Талқылау