Алматы әкімі Ерболат Досаев Наурызбай ауданының тұрғындарымен кездесу барысында мектеп асханаларына арналған жабдықтарды сатып алу туралы сұраққа жауап берді. Ол сыбайлас жемқорлыққа қарсы іс-қимыл агенттігімен бірлескен қала әкімдігінің жұмысы аясында бюджет қаражатын ұтымсыз жұмсамақ болғандарды тоқтатқанын мәлімдеді.

"Бұл тергеу нәтижесінде емес, превенция аясында әкімдік пен Антикордың бірлескен жұмысының арқасында анықталды. Тексеруден кейін 20 мектептің жабдықтарын сатып алу тоқтатылды. Әрі республика бойынша осындай тексерулер жүргізілді. 1,9 млрд теңге көлеміндегі қаражат бюджетке қайтарылды. Өткен жылға талдау жүргізілуде, бірақ асыра сілтеу деректері жоқ", – дейді Ерболат Досаев.

Әкім атап өткендей, бүгінде мемлекеттік сатып алу саласында ұсынылатын тауарлар мен қызметтердің, оның ішінде әлеуметтік маңызы бар объектілердің сапасына сәйкессіздік мәселесі өзекті болып қала береді.

"Өкінішке қарай, қазіргі мемлекеттік сатып алу жүйесі жосықсыз жеткізушілерге қатысуға мүмкіндік береді. "Баға мен сапа" қағидасы әрдайым жұмыс істемейді, яғни арзан тауар әрдайым сапалы бола бермейді. Мен бұған қарсымын. 2025 жылғы 1 қаңтардан бастап мемлекеттік сатып алу туралы жаңа заң күшіне енеді. Ол бойынша біз жеткізушілер мен олардың тауарлары талаптарға сай болады деп күтеміз. Сондай-ақ мемлекеттік сатып алуға қатысушылардың жауапкершілігі артады", – деді әкім.

Талқылау