"Болашақ жарым үйде отырады": Amre жарына қоятын талаптарын айтты
Жастар арасында Amre лақап атымен танылған әнші Ернар Садырбаев көпшілікке жан сырын ақтарды. Бұл туралы Stan.kz ақпарат агенттігі “1001 түн” бағдарламасына сілтеме жасап хабарлайды.
Фото: https://www.instagram.com/amre_official/
Өнер иесі 29 жасқа толса да отбасын құруға асықпайтын көрінеді.
“Мен үшін жеке өмір – жеке тақырып. 29 жасқа толсам да отбасын әлі құрған жоқпын. Бірақ қатты құрғым келеді. Осы күнге дейін тек жұмыс істеп келіппін. Енді ойланып жатырмын. Мақсатым – тек ән жазу, жаңа әндер ұсыну. Жеке өмірімді мүлдем ойламағанмын. Мен соны 29 жасқа толғанда түсіндім. Бір қызбен басынан аяғына дейін нақты дұрыс жүрмеппін. Оны мойындау керек. Менің ойымда тек жұмыс, белгілі бір сатыға өсу болған. Әке болғым келеді. Сүйікті, адал жар болуға уәде де беремін. Қазір шаңырақ көтеруді ғана ойлап жүрмін. Отбасы институтын қалыптастырған әкем мен анамнан үлгі аламын. Әке-шешем бір-біріне адал болды. Әркімнің өзінің орны бар. Мен де сондай отбасы болғым келеді. Әрине, бәріне үлгеріп жүрген жігіттер бар, мен аңқау болыппын. Әр нәрсенің уақыты болады. Мен отбасындағы жауапкершілікті еркек ретінде білемін және сезінемін", – деп ағынан жарылды өнер иесі.
Сонымен қатар болашақ жарына қоятын талаптарын да айтып өтті. Десек те әнші жарының өнерден алыс болғанын қалайтынын жасырмады.
“Болашақ әйеліме үйде отырасың, ыдыс жуасың деп айтқым келмейді. Бірақ бір үйге бір өнер адамы жетеді. Мен әрдайым түзде жүретін адаммын. Гастролім, концерттерім бар. Ол кісінің үйде отырғанын қалаймын. Болашақ балаларымызды тәрбиелеп әрі менің әке-шешеме қарап отыратын қыз болғаны жақсы. Ол мен үшін өте маңызды”, – дейді әнші.