Базалық мөлшерлеме 16,5% деңгейінде сақталады – Ұлттық банк

Фото: nationalbank.kz

Қазақстан Ұлттық банкі базалық мөлшерлемені 16,5% деңгейінде сақталатынын мәлімдеді. Бұл туралы Stan.kz ақпарат агенттігі хабарлайды.

Ұлттық банктің мәліметінше, бұл шешім болжамды раундтың нәтижелеріне негізделді. Оның аясында негізгі макроэкономикалық көрсеткіштердің болжамы жаңартылып, инфляция тәуекелдерінің балансы қайта бағаланды.

Жылдық инфляция шілдеде 11,8% деңгейінде сақталды.

“Азық-түлік және азық-түлікке жатпайтын тауарлар бағасы үздіксіз өсті, ал қызметтер бағасының өсуі жыл басынан бері алғаш рет баяулады. Соның нәтижесінде азық-түлік тауарларының жылдық инфляцияға қосқан үлесі бұған дейін негізгі фактор болған қызмет көрсету секторының үлесінен асып түсті. Ақылы қызметтердің инфляциясы реттелетін бағалардың өсу қарқынының төмендеуі есебінен де баяулады”, – делінген хабарламада.

Қазақстан экономикасының 2025 жылға арналған өсу болжамы 5,5-6,5%-ға дейін жақсарды. Экономикалық өсімнің қазіргі қарқыны жоғары қалыптасуына орай, жоғары инвестициялық белсенділікке және орнықты тұтынушылық сұранысқа байланысты болжам қайта қаралды.

2026 жылға болжам 4-5% деңгейінде сақталды. Мұнай секторындағы өсімнің жалғасуы және инвестициялық белсенділік 2026 жылы экономиканың өсуін қамтамасыз етеді. Жаңа болжамдарға сәйкес 2027 жылдан бастап ЖІӨ өсуінің қарқыны теңгерімділік деңгейге ұмтылады.

“Ақша-кредит саясаты туралы баяндамада ұсынылады.  Қазақстан Республикасы Ұлттық Банкінің Ақша-кредит саясаты комитетінің базалық мөлшерлеме бойынша кезекті жоспарлы шешімі 2025 жылғы 10 қазанда Астана қаласының уақытымен сағат 12:00-де жарияланады”, – деп мәлімдеді Ұлттық банк.

Бұған дейін Ұлттық банк төрағасы базалық мөлшерлеме жыл соңына дейін 16,5 пайыз деңгейінде сақталуы мүмкін екенін айтқан еді.