Батыс Қазақстанда 16 жастағы қызды зорлады деген күдікпен 68 жастағы шенеунік қамауға алынды

Фото: nashreporter.com

Батыс Қазақстан облысында 16 жастағы қызды зорлады деген күдікке ілінген 68 жастағы шенеунік қамауға алынды. Бұған дейін қоғамда үлкен резонанс тудырған іс бойынша тергеу қайта басталып, күдікті уақытша ұстау изоляторына қамалды. Бұл туралы Stan.kz ақпарат агенттігі Tengrinews.kz  порталына сілтеме жасап хабарлайды.

Ведомствоның мәліметінше, қылмыстық іс облыстық полиция департаменті тергеу басқармасының өндірісіне алынған.

"Кәмелетке толмаған қыздың әкесі айтқан қосымша деректер сотқа дейінгі тергеп-тексеру аясында тексерілді. Күдікті қамауға алынды", – деп хабарлады департамент өкілдері.

Полиция бұл іс облыстық полиция департаменті басшылығы мен прокуратураның ерекше бақылауында екенін айтты. Тергеу мүддесіне байланысты өзге ақпарат жарияланбайды.

Бұған дейін жәбірленуші қыздың әкесі БАҚ-қа мәлімдеме жасап, 68 жастағы шенеунік оның 16 жастағы қызын алдап үйіне шақырып, зорлық әрекеттерін жасағанын айтқан. Сондай-ақ ол полицияның әрекетсіздігіне шағымданып, күдіктінің бастапқыда ұсталғанымен, кейін босатылғанын және тергеу өте баяу жүргізілгенін мәлімдеген.

Ал бастапқыда өңірлік полиция өкілдері тараптар арасында "өзара келісім болған" деп мәлімдеп, телефондағы жазбаларға сілтеме жасаған. Сондай-ақ қыздың анасы мен жәбірленушінің өзі шағымданудан бас тартқаны айтылған. Алайда бұл оқиға қоғамда резонанс тудырғаннан кейін іске Ішкі істер министрлігі араласты. Мәжілістегі брифингте ішкі істер министрінің орынбасары Санжар Әділов істі тоқтату туралы шешімнің күшін жойып, тергеу қайта басталғанын хабарлады.

Сонымен қатар журналистер істі бұрын жауып, күдіктіні босатқан қызметкерлердің тәртіптік жауапкершілігі мәселесін көтерді. ІІМ негізгі сотқа дейінгі тергеу аяқталған соң қызметтік тексеру жүргізу туралы шешім қабылданатынын мәлімдеді.

• Қостанайлық әйел экс-күйеуін асыранды қызына жыныстық сипаттағы әрекеттер жасады деп айыптады

• Ақтөбеде кәмелетке толмаған қызды зорлаған әскери қызметкер 15 жылға сотталды

Еске салайық, бұған дейін Астанада 7 жасар шөбересін зорлаған атаға үкім шыққанын жазған едік. Қылмыс баланың туған күніне туыстары жиналған кезде үйде болған. Үлкен атаны оқиға орнында отбасы мүшелері ұстап алған. Бұл мән-жайлар куәгерлердің айғақтарымен және сот-медициналық сараптама нәтижелерімен, соның ішінде генетикалық тестімен расталды. Сот айыпталушыны Қылмыстық кодекстің 121-бабының 4-бөлігі "Жыныстық зорлық-зомбылық көрсету" бойынша кінәлі деп танып, оған 20 жыл бас бостандығынан айыру жазасын берді.