Бас прокурор еліміздің әр өңірінде ішімдіктің орнына балаларға арналған өнімдер сатыла бастағанын айтты
Бас прокурор Берік Асылов Қазақстанның әртүрлі аймақтарында алкоголь сатудан бас тартудың оң әсерін баяндады. Бұл туралы Stan.kz ақпарат агенттігі хабарлайды.
Фото: freepik.com
Ол өзінің Х парақшасында Ақмола, Жамбыл, Қарағанды, Атырау, Маңғыстау және басқа облыстардың спирттік ішімдіктерді сатудан өз еркімен бас тартқанын мәлімдеді.
"Елімізде жүздеген ауыл өз еркімен ішімдік сатудан бас тартты. Бұл қарапайым халықтың саналы таңдауы. Тәртіп, денсаулық, балаларының болашағы үшін", – деп жазды Берік Асылов.
Оның сөзінше, елдегі ауылдардың жалпы санын ескерсек, бұл мұхитқа құйған тамшыдай болып көрінуі мүмкін.
"Бірақ бұл оң көрсеткіш. Осындай елді мекендер көбейіп келеді. Адамдар сенім, тұрақтылық пен татулықты жоғары бағалайды және бір-біріне үлгі болады", – дейді ол.
Бас прокурордың айтуынша, бұл бастама алғашында прокуратура, полиция және жергілікті әкімдіктердің қолдауымен басталды. Сондай-ақ ақсақалдар мен қоғамдық кеңес тарапынан мәселе көтеріліп, ұйымдастырылғанын айтты.
"Ауыл кәсіпкерлері де ерекше алғысқа лайық. Жерлестерінің үнін ескеріп, олар дүкен сөрелерінен ішімдікті өз еркімен алып тастады. Бастапқыда күмәнданғанымен, табыстары азайған жоқ. Керісінше, ауыл тұрғындары ішімдіктің орнына балаларға пайдалы азық-түліктерді жиі сатып ала бастады", – деді Берік Асылов.
Берік Асыловтың айтуынша, ішімдіктен бас тартудың арқасында бірнеше ауылда қылмыстық әрекет азайды.
"Бірқатар ауылда қылмыс нөлге дейін төмендеп, тұрмыстық кикілжіңдер жойылып, жастар спорт пен саналы жолды таңдады. Тәртіп қорқыныш арқылы емес сенім арқылы, жаза арқылы емес саналы таңдаумен орнайды", – деді Берік Асылов.
Мемлекет басшысының "Құқықтық тәртіп" принципі өз мәні бойынша кемелденген демократияның және құқықтық мемлекеттің негізі” деген сөзіне тоқталған Бас прокурор "болашаққа деген қамқорлық, қоғамдық келісім мен заңға құрметке негізделген" әрбір бастамаға қолдау білдіретінін жеткізді.
"Ресми статистикаға сәйкес, 2025 жылдың 3 айында мас күйінде жасалған қылмыстық құқық бұзушылықтар санының азайғаны байқалады", – деді Берік Асылов.
Айта кетейік, бұған дейін Түркістан облысында 30-ға жуық ауыл ішімдіктен бас тартқаны туралы жазған едік.