БАҚ Ресейде Telegram-ның толық бұғатталатынын хабарлады: Ресейліктер Max мессенджерін пайдалануға тиіс
Ресей билігі “Telegram мессенджерінің жұмысын баяулату бойынша жұмысты бастау” туралы шешім қабылдады. Сарапшылардың пікірінше, бұл мессенджердің толық бұғатталуына әкелуі мүмкін. РБК ақпараттық технологиялар саласындағы және тиісті ведомстволардағы дереккөздерге сілтеме жасады. Бұл туралы Stan.kz ақпарат агенттігі хабарлайды.
РБК дереккөздерінің мәліметінше, Роскомнадзор 10 ақпаннан бастап Telegram жұмысына шектеу енгізе бастайды.
Роскомнадзор бұл хабарламаларға қатысты түсініктеме береді. Мессенджер “Ресей заңнамасын әлі де орындамай отырғандықтан”, ведомство оған “кезең-кезеңімен шектеулер енгізуді” жалғастыратынын мәлімдеді.
Роскомнадзор мессенджер жұмысына кедергі келтіруді былтыр жазда бастаған. Ресми түрде Telegram жұмысына шектеу енгізуді 2025 жылғы 13 тамызда жариялаған. Сол кезде Роскомнадзор Ресейде WhatsApp-тағы қоңырауларды “ішінара шектеу шаралары қабылданып жатқанын” да мәлімдеген.
“Бұл мессенджерлер “Ресей азаматтарын алдау, ақша бопсалау, диверсиялық және террористік әрекеттерге тарту үшін пайдаланылатын негізгі дауыстық сервистерге айналған”, – дейді реттеуші орган.
Ресей билігі өз әрекеттерін Telegram мен WhatsApp “IT-компанияларды жергіліктендіру туралы” заңды орындамайды, яғни пайдаланушылардың деректерін Ресей аумағында сақтамайды деп те түсіндіреді.
Сарапшылардың пікірінше, осылайша билік Ресей тұрғындарын үкімет шілде айында “ұлттық мессенджер” деп жариялаған Max қосымшасына көшуге мәжбүрлеуі мүмкін.
Тамыз айында Роскомнадзор Ресейде WhatsApp пен Telegram мессенджерлерінің жұмысына шектеу енгізілгенін ресми түрде мәлімдеді. Кейін WhatsApp-қа қатысты шектеулер күшейтіліп, қоңырауларды шектеу басталды.
Қарапайым тілмен айтқанда, “ауыр” пакеттер өтпей қалды, оған қоңыраулар жатады. Одан кейін шектеулер WhatsApp-тағы хабарламаларға да әсер етті, яғни “жеңіл” пакеттерге дейін шектеліп, іс жүзінде мессенджер толық бұғатталды.
Telegram болса, "ауыр" пакеттер өтпейтін деңгейде қалған еді. Бір ай бұрын адамдар үлкен көлемді видеолар жүктелмейтініне шағымданған. Қоңырау мен видео техникалық тұрғыдан қауіп-қатерге қарсы құралдар үшін шамалас – яғни өткізілмейтін үлкен деректер пакеті.
Қазір Ресейде Telegram-да тіпті шағын фотосуреттердің өзі қиындықпен жіберіліп жатыр. Яғни, шартты түрде айтқанда, өте шағын көлемдегі ақпарат қана өтеді. Кейбіреулер тіпті хабарламалардың да жетпей жатқанын айтады. Бұл – іс жүзінде толық бұғаттау деген сөз.
Алматы облысында кәсіпкер қараусыз қалған ғимаратты қалпына келтірген, алайда әкімдік оны тартып алған
